Bernardo Varela “”Non podemos permitir que Ourense se converta nun Monforte II; ou defendemos os talleres agora ou acabarán en cero.”
Ourense, 3 de xuño de 2025. Luís Seara, Bernardo Varela e Iago Tabarés, representantes institucionais Bloque Nacionalista Galego no concello de Ourense, na Deputación e no Parlamento de Galiza respectivamente, mantiveron este martes un encontro cos representantes sindicais dos traballadores de RENFE, no que se abordou a gravísima situación dos talleres de Ourense. A reunión tivo lugar no marco dunha campaña de contactos que o persoal ferroviario está a desenvolver con diferentes forzas políticas e institucións co obxectivo de frear un proceso de desmantelamento encuberto do talleres de RENFE..
Durante a comparecencia ante os medios, o portavoz provincial do BNG, Bernardo Varela, manifestou con rotundidade que o Bloque “acompañará sen fisuras esta loita en defensa dos talleres de Ourense, dos postos de traballo e do papel estratéxico do sector ferroviario na provincia”.
Pola delegación sindical, Diego ,representante da CXT en RENFE, trasladou a preocupación do persoal pola recente decisión de trasladar o mantemento da serie de locomotoras 3000 a unha sociedade de capital maioritariamente privado. Esta decisión, aseguran, supón “un incumprimento flagrante” do acordo asinado hai apenas dous meses polo Ministerio de Transportes, RENFE e os representantes dos traballadores, que comprometía a continuidade das cargas de traballo durante un mínimo de cinco anos.
Segundo indicaron, esta manobra pon en risco inmediato 35 postos de traballo directos e representa “un modelo de privatización silenciosa” que replica experiencias como a de Monforte de Lemos, onde os talleres foron esmorecendo ata quedar cun único traballador activo, actualmente en proceso de ser desprazado.
Bernardo Varela cualificou como “intragable” a vulneración dos compromisos asinados e anunciou a presentación dunha batería de iniciativas nas diferentes institucións nas que o BNG ten representación, como o Parlamento de Galiza, a Deputación de Ourense e o Concello da cidade. “Apostamos por un modelo público e galego de ferrocarril, que atenda ás necesidades de mobilidade e industria do país, sen recorrer a subterfuxios societarios que esquiven o control público e a calidade do emprego”.
Pola súa banda, o deputado do BNG no Parlamento de Galiza, Iago Tabarés, quixo por de manifestó o compromiso deo BNG co transporte ferroviario ante os representantes dos traballadores e da sociedade e lembrou que a potenciación do transporte ferroviario forma parte do acordo de investidura co PSOE e que por fin se comeza a estudar unha rede de cercanías en Galiza,
A organización nacionalista avoga, sinalou Tabarés, tal e como xa se ten demandado mesmo da man dos empresarios dos polígono de San Cibrao e do Pereio de impulsar a proposta dun nodo loxístico e ferroviario no parque empresarial, unha estación de mercadorías San Cibrao Taboadela, cun taller de reparacións e servizos auxiliares e orientado á creación de emprego e valor industrial para o país.
“Ourense non pode ser o novo Monforte. É o momento de actuar con decisión para garantir futuro e dignidade para o noso tecido produtivo.” Remataba sinalando Varela.
