O Ministerio de Transportes, Mobilidade e Axenda Urbana investirá 232.280 euros na remodelación integral do tramo urbano de 1,6 quilómetros de lonxitude da estrada N-541 (Ourense-Pontevedra), según o proxecto solicitado polo Concello do Carballiño. As obras comprenderán o tramo entre as rotondas da ‘Casa Azul’, na rúa Francisco Castelló, e da Fontela, na avenida 25 de Xullo, ao longo de 1.650 metros.
Consistirán no extendido de 2.014 toneladas de aglomerado asfáltico, ademais do pintado de 5.072 metros de liñas brancas e 509 metros cadrados o cebreado (señalización horizontal de zonas de prohibición de circulación). O proxecto tamén contempla a sobreelevación dos pasos de peóns, co obxectivo de reducir a velocidade no tramo, coa previsión de crear un novo fronte ao supermercado Mercadona, e a colocación de sinais luminosas no existente á altura da intersección da rúa Otero Pedrayo. Todo elo, entre os puntos quilométricos 25,450 e 27,100 da estrada N-541.
A promotora deste proxecto é a Concellería de Seguridade Cidadá e Tráfico que dirixe o concelleiro Alberto Otero, que tamén acometerá previamente e con cargo ás arcas municipais unhas obras de canalización soterrada no cruce de Catro Camiños. Estes traballos, que suporán un investimento aproximado de 75.000 euros, permitirán a instalación dun novo cableado e dun novo grupo semafórico nesta perigosa intersección.
Alberto Otero apunta que a nova instalación, que se adaptará á normativa vixente, “é completamente necesaria xa que os actuais cables, de hai uns 40 anos ao igual que os semáforos, foron colocados nesa época na rede de saneamento, e o deterioro da mesma é o que está a producir cortes no subministro eléctrico debido a erosión por actividade de roedores e humidade”. Asemade, o Concello do Carballiño tamén aproveitará para facer o mesmo tipo de canalización no entronque da avenida 25 de Xullo con Otero Pedrayo, “pensando xa nun futuro grupo semafórico nesta zona”, adianta o edil de Tráfico.
Os traballos necesarios para a canalización comezarán na noite de hoxe e con previsión de continuar na noite de mañá, xoves 5 de xuño, polo que dende o Concello se prega á veciñanza que circule con precaución por este tramo.
En canto á execución do proxecto financiado polo Ministerio, está previsto que os traballos teñan o seu inicio na semana vindeira, concretamente a partires do día luns, día 9 de xuño.
