Alfonso Medela acompañarase mañá de tres músicos virtuosos no seu concerto na Praza da Veracruz

Nesta semana previa á ‘LXIII Festa do Pulpo’, a organización do evento tivo a ben sorprender á veciñanza e visitantes coa celebración dun extraordinario concerto nocturno na Praza da Veracruz, nun espazo aberto que se converterá en máxico cando se acenda o novo alumeado instalado na contorna e na fachada do templo deseñado no Carballiño por Antonio Palacios.

A cita terá lugar mañá, día 6 de agosto, dende as 23,00 horas, e o recital terá como protagonista a un cuarteto ‘On Cue’ liderado polo pianista Alfonso Medela. O músico carballiñés estará acompañado por L.A.R. Legido á batería e Oscar Rodríguez no contrabaixo, mentres Rubén Fernández poñerá a voz. Catro intérpretes que non defraudarán ao público. “Vai ser un concerto no que a creatividade e imaxinación dos músicos non van deixar impasible a ninguén, e no que vai haber moitas sorpresas”, adiántanos o propio Alfonso Medela.

Catro virtuosos que son “catro pés” dun banco no que o jazz tradicional e latino, os ritmos caribeños e outras melodías americanas aséntanse na voz dun dos cantantes máis apreciados a nivel nacional; nun batería que é un artista da improvisación; nun contrabaixista colaborador habitual de Paquito D’Rivera, e nun especialista no manexo do teclado branco e negro, que, coma os seus tres colegas, posúe anos de moita traxectoria na súas costas.

“Penso que é unha excelente oportunidade para veciños e visitantes de desfrutar dun concerto de jazz no novo escenario co que contaremos despois da inauguración da nova iluminación do templo da Veracruz”, conclúe Alfonso Medela.

PUBLICIDADE ---------------------------------------------------------------------------------------------------