https://www.facebook.com/share/v/1YFCXKkZSq
As pulpeiras e pulpeiros do Carballiño batiron o récord mundial e lograron elaborar a tapa de pulpo máis grande do mundo con 600 quilos de cefalópodo. Pouco antes das oito da tarde, a Praza Maior estaba repleta de veciños e visitantes que non dubidaron en achegarse a animar aos grandes protagonistas da xornada: as máis de 40 pulpeiras e pulpeiros, que se preparaban arredor do gran prato, de 5,37 metros de diámetro. Lograron cortar 10 quilos máis que o ano pasado, alcanzando os 600 quilos.
Esta 15ª edición da elaboración da tapa realizouse en 10 minutos e 30 segundos. Unha vez rematado o corte, aderezaron o pulpo con 8 quilos de sal, 54 litros de aceite e 3 quilos de pimentón doce e picante. Un novo récord que sextuplica o volumen de pulpo acadado na primeira edición deste reto, alá polo ano 2010 e coincidindo coas andanzas do ‘Pulpo Paul’, que pronosticara a vitoria do equipo de España no Campionato do Mundo de Sudáfrica.
A Asociación de Pulpeiros do Carballiño repartiu máis de 1.600 tapas de pulpo entre o público asistente, que por 7 euros desfrutou dunha tapa de pulpo, pan, viño, postre, o prato especialmente gravado, pulseira e chaveiro elaborado polos usuarios de Aspadisi. O DJ Tibu encargouse de poñer a animación musical, así como de guiar a elaboración da tapa.
Ademais do alcalde, José Castro, e os concelleiros de Turismo, Manuel Dacal, Cultura, Diego Fernández, e Seguridade, Alberto Otero, estiveron presentes no acto Sonia Pires, edil de Turismo de Alijò, municipio irmandado có do Carballiño, e Marisol Rodríguez, presidenta da CEO, entre outros persoeiros.
