Ribadavia será un dos escenarios protagonistas das Xornadas Europeas da Cultura Sefardí 2025, que este ano levan por título “People of the Book” (O pobo do libro). A cerimonia de inauguración celebrouse o pasado 31 de agosto en Estocolmo e, a partir do 7 de setembro, numerosas cidades europeas acollerán actividades arredor da memoria e do legado sefardí. No caso da nosa vila, o programa desenvolverase entre o 3 e o 27 de setembro cun amplo abano de propostas culturais, gastronómicas e divulgativas.
O arranque das actividades terá lugar os días 3 e 4 de setembro cun obradoiro de repostaría titulado “O pobo do libro”, que se celebrará na Cafetería do IES Ribeiro e permitirá aos participantes achegarse á tradición doceira sefardí. O día 4, ás 20.00 horas, será a quenda da conferencia “A gastronomía do pobo do libro”, impartida por Chema Dapena na Sala do Centro de Información Xudía de Galicia, situada na Oficina de Turismo de Ribadavia.
A fin de semana do 13 e 14 de setembro abrirá as portas o Museo Sefardí de Galicia, ofrecendo aos visitantes a oportunidade de coñecer o seu valioso patrimonio en horario ampliado, mentres que o domingo 14 terá lugar unha visita guiada pola xudería de Ribadavia, con saída desde a Oficina de Turismo ás 12.00 horas e de balde para todo o público.
O mes de setembro pecharase cunha proposta especialmente saborosa: durante os días 26 e 27, diversos establecementos de hostalaría e restauración da vila ofrecerán pratos e receitas inspiradas na tradición sefardí, permitindo que veciños e visitantes degusten unha cociña chea de historia e simbolismo.
As Xornadas Europeas da Cultura Sefardí 2025 están organizadas polo Concello de Ribadavia en colaboración coa Red de Juderías de España – Caminos de Sefarad e a AEPJ (European Association for the Preservation of Jewish Heritage).
