O Grupo Provincial Socialista abstense na votación ao lograr case todas as súas demandas: incremento no CooperOU e Plan de Vivenda, maior apoio a conservatorios e compromiso de disolución do Inorde
Malia o continuísmo e falta de ambición transformadora dos orzamentos, os socialistas demostran que é posible facer oposición útil, construtiva e eficaz con resultados concretos para a cidadanía.
Durante o debate, Álvaro Vila denunciou a “vitimización constante” do PP, que aproveitou para arremeter contra o goberno central e culpabilizalo das eivas e limitacións da xestión provincial.
Ourense, 28 de novembro de 2025. O Pleno da Deputación de Ourense ven de aprobar os orzamentos para o exercicio 2026, que ascenden a 110,475 millóns de euros, despois de aceptar o goberno provincial case todas as propostas de mellora presentadas polo Grupo Provincial Socialista. O PSdeG-PSOE, que optou pola abstención tras comprobar a incorporación das súas demandas, consegue un triunfo político significativo ao converter as súas peticións en concrecións orzamentarias, cunha achega total de 2,75 millóns de euros en máis recursos para políticas que precisa a provincia.
“Hoxe volvemos demostrar que o traballo serio, rigoroso e construtivo da oposición logra obter resultados palpables e verificables para a cidadanía ourensá”, sinalou Álvaro Vila Araújo, voceiro do Grupo Provincial Socialista e secretario provincial do PSdeG-PSOE, tralo debate orzamentario. Segundo este, “o PP aceptou practicamente todas as nosas propostas porque eran razoables, tecnicamente viables e respondían a necesidades reais da provincia e dos nosos concellos”. “Isto é política útil, non propaganda baleira”, sentenciou o líder socialista.
OS MELLORES ESTABLECEMENTOS
CooperOU, Plan de Vivenda e conservatorios
O primeiro gran logro do PSdeG-PSOE nos orzamentos foi conseguir que o goberno provincial se comprometese a incrementar a partida variable do Plan CooperOU en 2 millóns de euros adicionais ao millón xa previsto, situando o plan en 21 millóns de euros totais para 2026. Este incremento sitúa o CooperOU no 19% do orzamento provincial, avanzando de xeito substancial cara ao cumprimento do compromiso do presidente Menor co Grupo Provincial Socialista para acadar o 22% no último ano de mandato.
Ademais, o goberno comprometeu que este incremento se fará nunha modificación de crédito separada e específica, evitando que se mesturen esta achega adicional aos concellos con outras partidas discrecionais. “É unha vitoria para os 92 concellos da provincia, nomeadamente para os máis pequenos, que poderán planificar mellor as súas políticas e proxectos con financiamento obxectivo e transparente”, valorou Vila.
O segundo gran logro socialista foi conseguir que o goberno provincial non só aceptase incrementar o Plan Provincial de Vivenda de 500.000 a 1.200.000 euros. “Isto demostra que era insuficiente a dotación inicial. A vivenda é unha prioridade social na nosa provincia e estes recursos permitirán aos concellos comprar e rehabilitar inmobles para aluguer social”, destacou o voceiro socialista. Esta duplicación da partida permitirá multiplicar o número de actuacións e xerar un parque público de vivendas significativo no rural ourensán.
O Grupo Provincial Socialista tamén logrou a aceptación íntegra da súa proposta de ampliar a dotación para os cinco conservatorios profesionais de música da provincia de 40.000 a 50.000 euros por centro, pasando a partida total de 200.000 a 250.000 euros. Os conservatorios de Ourense, Verín, O Barco de Valdeorras, O Carballiño e Ribadavia poderán verán reforzados os seus recursos para mantemento de instalacións, renovación de instrumentos e programación cultural. “A cultura e a formación musical son tamén estratéxicas para a provincia e merecen este reforzo. Os conservatorios son referentes nos seus territorios e o seu traballo debe ser valorado e apoiado”, afirmou Vila.
Compromiso de disolución do Inorde e vitimizacion do PP
Os socialistas tamén conseguiron que o goberno provincial se comprometese formalmente a compartir co resto de grupos o informe técnico que foi elaborado para avanzar cara a disolución do Instituto Ourensán para o Desenvolvemento Económico (Inorde) e a integración da súa misión e persoal nas estruturas da Deputación, en cumprimento do acordo plenario adoptado en novembro de 2024.
Amais, a petición directa de Álvaro Vila, Menor comprometeuse publicamente a elaborar un cronograma para executar esta integración. “Durante o último ano, o PP ignorou o acordo plenario de supresión do Inorde. Hoxe, grazas á presión do PSdeG-PSOE, comprométese a executalo. É un paso adiante que imos vixiar moi de preto para que as palabras se traduzan en feitos “, advertiu o voceiro socialista.
Durante o debate orzamentario, a vicepresidenta da Deputación, Marta Novoa, mantivo un ton eufórico na defensa dos orzamentos, se ben non dubidou en arremeter reiteradamente contra o Goberno de España, culpabilizándoo da “falta de orzamentos xerais do Estado” e de supostas “eivas” que, segundo ela, dificultan a xestión provincial. “E aínda así, esta Deputación fixo uns bos orzamentos”, sentenzou Novoa.
Álvaro Vila afeoulle esta “vitimización constante” e a actitude do PP de aproveitar calquera momento, mesmo cando non ten nada que ver co asunto tratado, para atacar ao Goberno de España. “O discurso do PP é sempre o mesmo: o que funciona é grazas ao PP, mesmo se non son eles a administración responsable ou pagadora; e o que vai mal ou non arranca, sempre é culpa do goberno central. É unha estratexia política de manual, que pasa pola vitimización constante para eludir responsabilidades propias”, denunciou o voceiro socialista.
“A Deputación de Ourense ten un orzamento de 110 millóns de euros, ampla autonomía de xestión e capacidade de decisión propia. Que non nos veñan dicir que as súas mans están atadas polo Goberno de España cando manteñen o 38% de gasto en persoal, cando reservan fondos para modificacións discrecionais, cando ignoran durante meses acordos plenarios como a disolución do Inorde, que implicaría recursos adicionais para a Deputación. As limitacións do PP non son imposicións de Madrid, son opcións políticas propias”, fincou Vila.
Abstención estratéxica e oposición útil que obtén resultados
Malia os logros, o Grupo Provincial Socialista mantivo durante o debate as críticas de fondo aos orzamentos de 2026: continuísmo, falta de ambición transformadora, ausencia de medidas específicas para a reconstrución tras os incendios de agosto, sobredimensionamento da estrutura administrativa e mantemento de partidas discrecionais. “Estes non son os orzamentos que a provincia necesita. Son uns orzamentos continuistas, sen ambición transformadora, que non responden á emerxencia que vivimos”, valorou o voceiro socialista.
A decisión de absterse responde a unha lóxica de recoñecemento dos avances conseguidos grazas ás propostas socialistas, demostrar o potencial da negociación e o diálogo, e situar ao PSdeG-PSOE como unha forza útil e eficaz que obtén resultados concretos. “Non facemos oposición por facer oposición. Facemos oposición útil, que mellora a vida da xente. E hoxe demostrámolo unha vez máis, como cando se aprobou o Plan CooperOu, que foi unha iniciativa socialista”, salientou o secretario provincial do PSdeG-PSOE.
