A Área da Muller e Igualdade do Concello do Carballiño vén de propoñer para o actual mes de decembro a celebración de tres obradoiros orientados á participación de mulleres do municipio e que teñen carácter gratuíto, un orientada ao Nadal e outros dous de carácter gastronómico. As tres citas desenvolveranse no local ubicado no segundo andar da Casa do Concello.
Así, para os días 9, 10 e 13 de decembro está previsto un obradoiro de elaboración de coroas de Nadal, que terá lugar de 16,30 a 18,30 horas e cun número de 10 prazas para cada unha das quendas, facendo un total de 30 que xa foron completadas, polo que o departamento da Muller abríu unha lista de agarda para cubrir posibles baixas.
Por outra banda, os obradoiros de cultivo de setas e elaboración de conservas trocan as datas previstas, ao abeiro das peticións formuladas polas propias solicitantes de praza. Deste xeito, o taller de conservas pasa a celebrarse o 15 de decembro de 16,00 a 19,00 horas, mentres que o de cultivo de setas trasládase ao sábado, día 20, en horario de 10,00 a 13,00 horas, cada un deles con 20 prazas ofertadas.
As persoas interesadas en participar nestes dous obradoiros poden inscribirse no propio CIM, situado nas dependencias de Servizos Sociais, na rúa Faustino Santalices, ou chamando ao teléfono 988.531.076.
