Así o manifestou na reunión do Consello Reitor do Consello Municipal de Deportes celebrada este mediodía o Portavoz do BNG Luís Seara, quen sinalou que “esas declaracións non as fai un veciño na barra dun bar senón a persoa que representa ao conxunto das veciñas e veciños e tamén ao conxunto dos clubes da cidade”
Ourense, 11 de decembro de 2025. Na reunión semanal do Consello Municipal de Deporte celebrada esta mañá no salón de Plenos da Casa do Concello, o Portavoz do BNG Luís Seara trasladou o “rexeitamento total do BNG ás declaracións do Alcalde e referidas ao Athletic Club de Bilbao”, rival do Ourense C.F. o vindeiro xoves nos dezaseisavos de final da Copa do Rei.
Seara incidiu en que “esas declaracións non as fai un veciño ou veciña na barra dun bar, fainas o Alcalde que representa ao conxunto da veciñanza e tamén ao conxunto dos clubes deportivos de Ourense. Esas declaracións demostran ademais que Gonzalo Pérez Jácome descoñece o que é a xenofobia”.
OS MELLORES ESTABLECEMENTOS
O Portavoz do BNG entende que con esas declaracións, Jácome demostra descoñecer a filosofía do Athletic Club. “Se algún equipo se caracteriza pola integración é o Athletic Club de Bilbao. Esas declaracións deixan a imaxe de Ourense polo chan, como en tantas outras ocasións e ademais tamén coloca aos clubes deportivos que compiten fóra das nosas fronteiras nunha situación moi delicada”.
Seara manifestou as desculpas do BNG ao Athletic Club, “a súa directiva, aos xogadores e ás aficionadas e aficionados, porque para nós si que é desde logo un auténtico privilexio xogar cun equipo que é historia viva do Balompé e que ademais é o segundo equipo que máis Copas do Rei leva gañado. Non é desde logo unha pedrea, é un auténtico privilexio poder xogar contra eles”.
