Os deputados do Grupo Popular Cristina Campero e Miguel Ángel Viso, acompañados do alcalde de Ribadavia, César Fernández, salientaron hoxe o importante aforro que suporá para todos os concellos o novo acordo aprobado pola Federación Galega de Municipios e Provincias para o financiamento do servizo de axuda no fogar, a través do que a Xunta incrementará un 50 por cento a súa aportación ao longo da presente lexislatura. En concreto, no caso dos concello da comarca do Ribeiro o aforro ata 2028 mantendo o servizo actual achegarase a 1,7 millóns de euros.
OS MELLORES ESTABLECEMENTOS
Cristina Campero explicou que a través deste acordo a Xunta aumentará de forma gradual a súa aportación para a prestación do servizo de axuda no fogar, unha competencia municipal segundo se recolle na Lei de servizos sociais de Galicia, aprobada polo Goberno bipartito de PSdeG e BNG no ano 2008. En concreto, a Xunta comprométese a incrementar de 12 a 16 euros por cada hora prestada este mesmo ano, subir un euro máis por hora para o 2027 e chegar aos 18 euros no 2028.
No caso concreto dos concellos da comarca do Ribeiro, Campero lembrou que, tomando como referencia que na actualidade se prestan máis de 110.000 horas anuais, o aforro para as arcas locais achegarase a 1,7 millóns de euros ao remate da presente lexislatura en 2028.
Pola súa banda, Miguel Ángel Viso asegurou que este incremento da aportación realizada pola Xunta “demostra que o Goberno galego está ao carón dos concellos galegos, sobre todo dos máis pequenos, que verán aliviadas as súas contas municipais para a prestación deste servizo tan importante”. Neste sentido, destacou que este aumento “facilitará que máis persoas dependentes poidan seguir vivindo con dignidade no seu propio fogar e co apoio que precisan”.
Porén, afirmou que “este servizo podería estar aínda mellor financiado se o Goberno de Pedro Sánchez puxera enriba da mesa o 50 por cento que lle corresponde pola Lei da dependencia, pero para desgraza dos galegos, en vez de achegarse a esa metade, cada ano reduce a súa aportación, que pasou nos últimos anos do 40 ao 34 por cento”. “Esta situación derivou en que neste momento a débeda que o Estado ten con Galicia pola prestación da dependencia se incremente día tras día, achegándose na actualidade aos 3.000 millóns de euros”, dixo.
