O CDR O Viso ten convertido a singular aldea de Sarreaus nunha ponte para o intercambio de aprendizaxes.
O profesorado da Formación Profesional Básica do IES Lagoa de Antela escolleu Lodoselo para continuar a preparación do alumnado de Cociña e Restauración. Parte das participantes comezarán proximamente a fase de prácticas en empresas da zona. Restaurantes como o 2 de Maio (Xinzo) ou o César (Viladerrei, Trasmiras) recibirán un alumnado con coñecementos para o traballo tanto na cociña como na sala.
En Lodoselo, ademais de cocer pan dun modo tradicional, coñeceron o servizo de Xantar no Fogar. O traballo profesional en cociñas no ámbito sociosanitario constitúe unha alternativa á hostalaría.
Así mesmo, pasou por Lodoselo o IES Lauro Olmo do Barco de Valdeorras para ampliar a formación das alumnas de Atención Sociosanitaria de Persoas en Situación de Dependencia. Puideron ampliar o seu currículo coa experiencia da Vivenda Comunitaria e do Centro de Día, baixo unha perspectiva de coidados centrados na persoa e na súa relación coa comunidade. O modelo de “coidarme, coidarte, coidarnos”, que abandeira como lema o CDR, serviu como punto de inicio dunha reflexión crítica por parte do alumnado.
OS MELLORES ESTABLECEMENTOS
Da man da Dirección e do equipo da biblioteca do Ceip de Rosalía de Castro (Xinzo de Limia), que acolleron a un grupo de representantes dos distintos centros de Ponte de Lima (Portugal) que conforman a Rede de Bibliotecas Escolares de dito municipio, recibímolos en Lodoselo e fixemos un recorrido polos distintos espazos e as contornas do Centro de día/Casa niño, espazo sensorial, a túa outra casa (Vivenda comunitaria tutelada), a casa reitoral (como enclave referencia do Pobo- escola)…
Nas próximas semanas prevese, entre outras, a chegada da Universidade de Santiago de Compostela co seu alumnado do grao de Educación Social, así como do CIFP Portovello co ciclo de Educación Infantil.
Esta actividade é posible grazas á CONSELLERÍA DE POLÍTICA SOCIAL E IGUALDADE. Orde do 23 de maio de 2025 pola que se establecen as bases que rexerán a concesión de subvencións a entidades privadas de iniciativa social para a promoción de actuacións de servizos sociais comunitarios e inclusión social para os anos 2025 a 2027, cofinanciada parcialmente pola Unión Europea no marco do Programa FSE+ Galicia 2021-2027, e pola que se procede á súa convocatoria (código de procedemento BS631A).
