O Carballiño converterase este sábado, 22 de agosto, nun dos escenarios do Circuito «DepOUrense Basket 3×3», unha iniciativa da Federación Galega de Baloncesto en colaboración coa Deputación de Ourense que reunirá nas inmediacións da Veracruz a 24 equipos de diferentes categorías. A cita foi presentada esta mañá no propio espazo no que se desenvolverá a competición nun acto no que participaron o alcalde en funcións do Carballiño, Pepe Castro, e o asesor de Política Deportiva da Deputación de Ourense, Enrique Álvarez.
O Concello aposta por trasladar esta actividade a un dos lugares máis representativos da vila, combinando a práctica deportiva coa capacidade de atracción e promoción que ofrece a contorna da Veracruz. Pepe Castro destacou precisamente que se trata dun “sitio incomparable” para celebrar unha competición destas características e convidou á veciñanza e ás persoas que visiten O Carballiño durante a fin de semana a achegarse para desfrutar da xornada.
O alcalde en funcións salientou tamén a boa resposta obtida pola convocatoria, con 24 equipos xa inscritos, e incidiu na vontade municipal de seguir impulsando propostas que fomenten hábitos de vida activos e que, ao mesmo tempo, contribúan a dinamizar a vila. “Queremos que O Carballiño medre no deporte e que a xente o pase ben participando en actividades deportivas”, sinalou.
Neste sentido, a elección das inmediacións da Veracruz responde tamén á intención do Concello de dar unha maior visibilidade á competición e aproveitar o potencial dun enclave singular para proxectar a imaxe do municipio. Castro explicou que existía a posibilidade de desenvolver a actividade noutra instalación deportiva, pero que se optou por este emprazamento para sumar ao atractivo do propio torneo o valor da contorna. O obxectivo, apuntou, é que O Carballiño continúe medrando tamén desde o punto de vista turístico, vinculando esa promoción ao deporte e á actividade na rúa.
Desde a Deputación de Ourense, Enrique Álvarez agradeceu a implicación da Federación Galega de Baloncesto e dos concellos participantes nun circuíto que celebra este ano a súa primeira edición. O asesor de Política Deportiva puxo en valor especialmente a acollida lograda no Carballiño, cunha participación que cualificou de moi positiva, e destacou que a propia localización contribuirá a aumentar a repercusión da actividade.
Álvarez definiu a Veracruz como “un símbolo non só para O Carballiño, senón tamén a nivel provincial” e explicou que unha das intencións do circuíto é precisamente levar o baloncesto 3×3 a lugares céntricos e recoñecibles, favorecendo que a competición saia das instalacións deportivas convencionais e se achegue á cidadanía.
A modalidade 3×3, xa integrada no programa olímpico, caracterízase por partidos curtos, rápidos e dinámicos e por equipos formados por catro xogadores. Tanto o Concello como a Deputación destacaron durante a presentación o seu carácter accesible e atractivo, xa que permite organizar equipos cun número reducido de participantes e facilita deste xeito a extensión da práctica deportiva.
O Carballiño conta ademais con experiencia previa neste formato tras a boa acollida do 3×3 celebrado dentro da programación do Verán Deportivo. Segundo indicou Pepe Castro, aquela experiencia “funcionou moi ben” e agora a incorporación ao circuíto provincial supón un novo paso para consolidar este tipo de actividades no municipio.
O Circuito «DepOUrense Basket 3×3», integrado no Programa de Fomento Deportivo 2026 da Deputación de Ourense, percorre durante este verán diferentes concellos da provincia. Tras a súa estrea en Muíños o pasado 16 de agosto e a parada prevista en Ribadavia este venres, 21 de agosto, chegará ao Carballiño o sábado 22. Posteriormente continuará en Xinzo de Limia, o 29 de agosto; Allariz, o día 30; e O Barco de Valdeorras, o 5 de setembro.
A competición está aberta a xogadores federados e non federados e inclúe as categorías de preminibasket e minibasket, infantil e cadete, e júnior e sénior, con participación de equipos masculinos, femininos e mixtos.
Os dous equipos finalistas de cada categoría en cada unha das sedes obterán a clasificación para a gran final do 19 de setembro no Pazo dos Deportes Paco Paz de Ourense, que pechará esta primeira edición do circuíto provincial.
A xornada deste sábado no Carballiño completarase ademais con animación e actividades complementarias, convertendo a contorna da Veracruz nun espazo de encontro arredor do deporte e coa aposta do goberno municipal por unha programación que combine actividade física, convivencia, dinamización e promoción da vila.
