O vindeiro sábado, 19 de setembro, ás 12:30 horas, o Espazo OZOCOgz (situado na Rúa Curros Enríquez, 29, no Carballiño) acollerá unha nova xornada de contacontos e presentación literaria. Nesta ocasión, volve a xenial escritora e contacontos Rita Doallo, quen presentará o seu novo libro, “Astralistoria”.
Rita Doallo non estará soa nesta cita. Estará moi ben acompañada pola ilustradora do libro, Estefanía Padullés. Ademais, e como novidade de última hora, tamén se sumará ao evento a escritora do Carballiño Sonia Moral (quen non aparece reflectida no cartaz promocional precisamente por ser unha achega de última hora).
Durante a presentación, as autoras falarán de “Astralistoria”, a obra de Rita Doallo que resultou gañadora do “IV Premio Simbad para o recordo e o Alzhéimer” (2025). Trátase dunha temática de gran sensibilidade e importancia social, xa que o Alzhéimer é unha enfermidade que, por desgraza, ten unha presenza demasiado habitual entre nós.
A entrada é libre e convídase a todos os veciños e amantes da literatura a asistir a esta cita cultural.
