O resultado consolida a maioría da central no sector a nivel nacional
Ourense, 18 de novembro de 2025.
A FGAMT-CIG fíxose con 2 dos 5 delegados sindicais na empresa Ambulancias As Burgas de Ourense ao sumar o 46,2% dos votos (24) nas eleccións sindicais que se veñen de celebrar. Este resultado afianza a maioría da central no sector a nivel nacional e supón un fito histórico en Ourense, xa que é a primeira ocasión na que a CIG foi quen de presentar candidatura ao proceso nesta compañía.
OS MELLORES ESTABLECEMENTOS
Este avance electoral é especialmente importante ao permitir que por primeira vez Ourense poida contar con representantes da CIG nas mesas de negociación do sector do transporte sanitario.
Por iso dende a central sindical agradecen profundamente o apoio recibido e expresan a súa total dispoñibilidade para continuar loitando pola mellora das condicións laborais das persoas traballadoras do sector, apostando por un servizo público e profesional de calidade.
Ao tempo que salientan que este resultado supón tamén rematar coa maioría “abafante” que durante anos mantiveron primeiro a UGT e despois a USO. “A irrupción da CIG rompe finalmente ese equilibrio e abre unha nova etapa no sector en Ourense”.
Finalmente, anuncian que continuarán traballando para acadar a maior representatividade posíbel na provincia e para destapar as “incoherencias” e “prácticas desleais” dalgúns, sempre desde a defensa firme dos dereitos da clase traballadora.
