O Auditorio Manuel María do Carballiño voltou a completar o seu aforo na noite de onte coa celebración da gala dos ‘Premios Arenteira’, que acadaron a súa 14ª edición da man do Aparthotel Arenteiro e o Grupo Cer&Ber e que son froito dunha selección por parte dun xurado de expertos presidido polo historiador Xosé Luis Sobrado. Estes galardóns valoran as traxectorias de persoas e entidades nos eidos cultural e deportivo e tamén se recoñece o traballo de persoeiros que xa nos deixaron e o esforzo do estudantado que debe superar os seus problemas de saúde, todos eles vencellados ás comarcas do Carballiño e O Ribeiro.
Un acto que contou coma conductora á carballiñesa Raquel Domínguez, presentadora da Televisión de Galicia (TVG), e o acompañamento musical da agrupación folclórica tradicional Tor e da cantante Mercedes Rodríguez, do grupo Leilía. O alcalde do Carballiño, Francisco Fumega, xunto con membros da súa Corporación como Diana González, Lorena Castro ou Manuel Vázquez, e o vicepresidente da Deputación Provincial, César Fernández, entre outros, quixeron arroupar aos premiados e ás súas familias.
O director do Aparthotel Arenteiro, Uriel Bernárdez, foi o encargado de abrir o turno de intervencións, dando paso a Xosé Luis Sobrado, que fixo unha loubanza dos galardonados polo xurado, cuxa acta foi leída previamente pola propia Raquel Domínguez. A continuación, sucedéronse os protocolos de entrega dos premios, na que os asistentes tiveron a oportunidade de visionar as respectivas opinións e comentarios de persoas máis achegadas ás catro persoas e entidades seleccionadas polos expertos.
Primeiro foi a quenda do mestre Claudio Mateo, fundador en 1997 da Escola Madokoan, que xa é todo un referente nacional nas disciplinas marcíais do hapkido e o jiujitsu, ademais de manter unhas óptimas instalacions adicadas á ximnasia, méritos que foron recoñecidos polo xurado. Un representante das Escolas Deportivas de Maside -premiadas na edición anterior- foi o encargado da entrega da estatuiña deseñada por Xesús Carballido.
No eido de Cultura e Investigación correspondente a 2025, premiouse a traxectoria empresarial de Ernesto Romero á fronte do seu Novocine de Leiro, unha sala de proxección –a única nas comarcas do Ribeiro e Carballiño- con máis de 40 anos de historia e que foi pioneira no cine dixital en 3D. Neste caso, Romero recibíu a figura dos ‘Arenteira’ da man de Felipe Gallego, da Asociación Cultural Avantar galardoada en 2024.
A título póstumo, o xurado lembrou a Antonio Rey Cornide, pola súa implicación en participar e promover actividades culturais na vila do Arenteiro, tanto á fronte da Coral Polifónica Casino do Carballiño e do Coro de Cámara ‘Música Viva’, como no seu papel de actor no grupo de teatro Tiruleque. Pablo Rey, fillo do falecido, recolleu o galardón das mans de Xosé Luis Sobrado. Os integrantes de ‘Música Viva’ entonaron unha das cancións preferidas do que fora o seu fundador, nunha emotiva interpretación na súa memoria.
Unha emoción que subiría de tono entre os presentes na gala, no intre de anunciar o galardón de Esforzo e Superación é para Icía Nogueira Crespo, unha xove estudante de 2º de ESO no Instituto de Ensino Secundario (IES) Nº 1 do Carballiño que con valentía e coa axuda da súa familia afronta un alto grao de discapacidade que non lle impide a súa adicación aos seus estudos, un exemplo de superación que foi corroborado nun vídeo polos seus compañeiros e a directora do centro de ensino, Almudena Mosquera.
A presentadora, Raquel Domínguez, rogou ao público que non aplaudira e sí fixese o xesto da lingua de sordos para ovacionar a Icía, que nunha cadeira de rodas estivo acompañada pola súa nai no escenario do Auditorio. O motivo, un dos síntomas da súa discapacidade, que lle impide soportar ruídos. Sen embargo, e tra-la entrega do premio por parte de Manuel Bernárdez, presidente do Grupo Cer&Ber, e un discurso de agradecemento da nai de Icía, ésta animous e comunicou que desexaba sentir o calor dos asistentes, que respostaron con fortes aplausos e ovacións.
Un ano máis, a gala dos ‘Premios Arenteira’ rematou coa interpretación do Himno Galego por parte de todo o público que acudíu ao Auditorio do Carballiño aos sons de Tor e Mercedes Rodríguez. Unha edición que quedou gravada no corazón dos asistentes.
A gala foi retrasmitida en directo para todo o mundo por badalnovas
