‘AntiqAuria’, Feira Internacional de Antigüidades de Galicia, abriu as súas portas onte venres en Expourense para ofrecer un particular ”Black Friday” con prezos especiais e animar aos visitantes para aproveitar o evento para realizar algunhas das compras do Nadal. As antigüidades están de moda nestas datas, xa que son cada vez máis os que prefiren regalar obxectos con alma e con historia e moitas veces únicos e irrepetibles. E un bo exemplo é o anuncio de Loterías de Nadal deste ano que crea unha emotiva historia a raiz da compra dun obxecto de segunda man.
A novena edición da Feira Internacional de Antigüidades, AntiqAuria, ofrece ao visitante unha viaxe ao pasado afastado (con pinturas e pezas de arte sacra do século XVIII e XIX) ata o pasado máis recente da década dos 80 e 90 do século XX e mesmo xa de comezos do século XXI. Medio cenetenar de expositores de España, Portugal, Francia, Bélxica e Suíza ofrecen máis de 30.000 obxectos de todos os prezos, tamaños, gustos e épocas nunha cita organizada pola Asociación “Memoria Antiga” coa colaboración de Expourense e da Deputación Provincial de Ourense.
Os expositores recibiron na tarde de onte a visita dunha comitiva integrada por representantes da Xunta de Galicia, a Deputación de Ourense, o Concello de Ourense, de deputados autonómicos e de asociacións empresariais. Trátase dunha cita moi esperada polos visitantes afeccionados ás antigüidades, o coleccionismo ou os obxectos vintage. Despois de nove edicións, AntiqAuria de posicionou xa como a mellor feira de antigüidades de Galicia pola cantidade e variedade de expositores como pola gran fidelidade do seu público que xa acudiu á feira desde primeira hora e cun fluxo constante de visitas durante esta primeira tarde.
OS MELLORES ESTABLECEMENTOS
“Os que realmente son afeccionados ás antigüidades veñen hoxe porque cada obxecto é único e é o mellor momento para facerse coas mellores pezas”, explican Gerardo Román e José Antonio Ferreiro, os dous fundadores de Memoria Antiga. No referente ás antigüidades propiamente ditas (obxecto con máis de 50 anos) como xoguetes, teléfonos, reloxos, mobles, xoias, utensilios de prata, porcelanas, etc. Na sección de coleccionismo de poderase atopar numismática, filatelia, obxectos militares e relixiosos, etc. Por último, esta cita conta tamén cunha área reservada para os afeccionados aos obxectos vintage (sec. XX), que se converteron nunha moda e nun referente á hora de decorar fogares ou negocios.
Mañá, domingo de poxa
Durante esta novena edición repetirase a “gran poxa” que terá lugar mañá, domingo día 30, a partir das 12,00 horas. Cada expositor cederá un obxecto para poxar entre o público asistente e cada un deles terá un prezo de saída de 5 euros. “Trátase dunha boa oportunidade para facerse con pezas únicas a moi bo prezo”, explican os organizadores. Durante a última edición a peza con maior poxar foi unha talla relixiosa de madeira do sugloXVIII procedente de Alemaña que alcanzou os 200 euros, aínda que a maioría de obxectos foron adxudicados por prezos comprendidos entre o 15 e os 30 euros.
O horario de apertura será mañá domingo de 10,00 a 14,00 e de 16,30 a 21,00 h. A entrada ten un custo de 3 euros e é gratuíta para menores de 12 anos.
