A Deputación de Ourense, a través do Inorde, presentará na Feira Internacional de Turismo (FITUR 2026), que se celebrará en Madrid, unha ampla programación de accións promocionais co obxectivo de reforzar a proxección turística da provincia como destino diverso, sostible e con identidade propia.
A actividade da institución provincial desenvolverase no stand de Galicia (pavillón 9), onde Ourense contará cun calendario específico de presentacións centradas no turismo rural, termal, enogastronómico e cultural, así como na posta en valor de produtos turísticos consolidados e novas liñas de promoción.
A presentación principal, a da provincia de Ourense como destino turístico será o vindeiro xoves 22 ás 12,30 horas. Ao día seguinte, a Deputación tomará parte na presentación do proxecto de Villas Termais e Históricas, co obxectivo de consolidar a marca Ourense como referente termal a nivel estatal. Outras das accións promocionais lideradas pola Deputación, a través do Inorde, serán as presentacións dos xeodestinos Trevinca-Valdeorras e o de Terras de Celanova – Serra do Xurés. Tamén serán promocionados os entroidos do oriente ourensán, Festa de Interese Turístico Nacional, un dos grandes sinais de identidade cultural da provincia.
OS MELLORES ESTABLECEMENTOS
Entre outras accións previstas destaca a presentación de itinerarios enogastronómicos de Valdeorras en colaboración con Escapada Rural, orientada a poñer en valor o potencial vitivinícola e gastronómico da comarca como atractivo turístico de primeiro nivel.
A Deputación tamén protagonizará un monográfico sobre turismo rural nas Terras de Celanova-Serra do Xurés, centrado na riqueza paisaxística, patrimonial e natural deste territorio e nas súas oportunidades como destino de natureza e experiencias sostibles.
Ademais, Ourense participará na difusión da campaña 2026 dos Trens Turísticos de Galicia, unha iniciativa clave para a atracción de visitantes e a vertebración turística do territorio.
A institución provincial tamén apoiará outras iniciativas promocionais que teñan a Ourense como protagonista en FITUR, como é o caso de Termatalia, a presentación da candidatura da Ribeira Sacra a Patrimonio da Humanidade ou outros xeodestinos da provincia.
Con esta presenza en FITUR, a Deputación de Ourense a través do Inorde reforza a súa aposta por un modelo turístico baseado na calidade, a sustentabilidade e a posta en valor dos recursos propios da provincia, combinando natureza, benestar, tradición, gastronomía e experiencias auténticas.
