A Deputación de Ourense reafirmou hoxe o seu apoio histórico á Universidade Nacional de Educación a Distancia (UNED), que desde a década dos anos noventa xoga un destacado papel na provincia “á hora de universalizar o acceso a educación universitaria”.
Así o afirmou o presidente provincial, Luis Menor, durante a recepción celebrada no Pazo Provincial aos membros do Consello do Campus Noroeste, delegación encabezada polo reitor, Ricardo Mairal Usón, acompañado polo director do centro en Ourense, Jesús Manuel García. A comitiva, que este ano escolleu a cidade de Ourense para a súa visita anual, representa ao campus máis grande da UNED en España.
Luis Menor subliñou que a Deputación de Ourense mantén un compromiso ininterrompido coa institución universitaria desde hai 34 anos, como membro do padroado do Consorcio da UNED Ourense desde a súa creación en 1992, onde está presente xunto ao Concello de Ourense, a Xunta de Galicia e o Concello da Rúa, onde tamén a UNED ten un centro asociado.
OS MELLORES ESTABLECEMENTOS
Un apoio institucional, engadiu Menor, “clave para potenciar unha oferta educativa que hoxe resulta imprescindible para xerar o talento que precisa a provincia”, ademais da súa integración no tecido social. Neste sentido destacou algúns datos da UNED referidos a Ourense, con 1.200 alumnos, cifra que ascende ata os 2.000 se se inclúen os cursos de extensión universitaria, xornadas e seminarios, así como as posibilidades de estudo que ofrece (30 graos, dous dobres graos, máis de 80 mestrados, 21 programas de doutoramento e máis de 800 títulos de formación permanente).
Sobre a UNED
A UNED en Ourense iniciou a súa andaina na Rúa a finais dos 80, abrindo o seu centro na capital en 1992. Trátase da universidade pública máis grande de España con 150.000 estudantes. Desde a súa fundación en 1972, o seu modelo online e semipresencial permitiu universalizar o ensino superior sen notas de corte, adaptándose ás necesidades laborais e familiares do alumnado en 18 países. O Consello do Campus Noroeste está integrado por 27 membros, entre directores e secretarios dos 14 centros asociados que conforman o Campus Noroeste, abarcando as comunidades de Galicia, Asturias, Castela e León e Estremadura.
