O Concello do Carballiño anima a veciñanza a participar no programa “Xuntos polo Nadal”, unha iniciativa da Xunta de Galicia dirixida a persoas de 60 ou máis anos que viven soas e non teñen con quen pasar estas festas. No municipio, o programa está xestionado pola Concellería de Servizos Sociais, Igualdade e Sanidade, que dirixe a concelleira Silvia Baranda.
A Residencia de Tempo Libre do Carballiño dispón de 130 prazas, das que 33 se reservan para persoas solicitantes da provincia de Ourense e 97 para as da Coruña. A estadía inclúe aloxamento en cuartos compartidos, pensión completa, actividades socioculturais e transporte en autobús desde os puntos de recollida establecidos.
Cada persoa solicitante poderá escoller unha das tres quendas dispoñibles. A primeira abrangue todo o período, do 23 de decembro de 2026 ao 7 de xaneiro de 2027. As outras dúas van do 23 ao 30 de decembro e do 31 de decembro ao 7 de xaneiro, respectivamente.
Requisitos e presentación de solicitudes
Para participar é preciso ter cumpridos os 60 anos ao remate do prazo de solicitude, estar empadroado nun concello galego, vivir só no propio domicilio e non ter con quen pasar o Nadal. As persoas solicitantes deben poder valerse por si mesmas e non padecer enfermidades transmisibles con risco de contaxio nin trastornos mentais ou de conduta non compensados que poidan afectar á convivencia durante a estadía.
O prazo de presentación de solicitudes está aberto ata o 30 de novembro. As persoas interesadas deben cubrir o formulario normalizado e achegar unha declaración responsable e un informe social. A solicitude pode presentarse preferentemente a través da sede electrónica da Xunta de Galicia, mediante o formulario PR004, ou presencialmente nun rexistro habilitado.
As persoas interesadas poden dirixirse aos Servizos Sociais do Concello do Carballiño para obter máis información e orientación sobre a documentación necesaria e a presentación da solicitude..

















