Inauguración centro “Manuel Chamoso” en Boborás

Inauguración do Edificio Multiusos en Boborás chamado “Manuel Chamoso Lamas”. Asisten Manuel Baltar (Presidente Deputación Ourense), Patricia Torres Madureira (Alcaldesa de Boborás), Alberto Nuñez (Presidente Xunta), Angeles Chamoso (FIlla de Manuel Chamoso), Jose González (Conselleiro de Medio Rural) entre outras autoridades e veciños.

Baltar destaca na inauguración do centro socio cultural de Boborás o exemplo de Ourensanía e compromiso coa terra de Chamoso Lamas e de Losada Diéguez

Publicidade

O presidente da Deputación de Ourense expresou que este centro deberá manter vivo o lume da memoria destes intelectuais, “o seu compromiso de fillos dun tempo e dunha terra e o sentimento de pertenza e leal compromiso con Galicia, nación cultural solidaria”

No acto, celebrado esta mañá en Boborás, Manuel Baltar participou xunto ao presidente da Xunta, Alberto Nuñez Feijoo; a alcaldesa do municipio, Patricia Torres; e Ángeles Chamoso, filla de Manuel Chamoso Lamas

O presidente da Deputación de Ourense, Manuel Baltar, destacou hoxe, no acto de inauguración do centro sociocultural “Manuel Chamoso Lamas” de Boborás o exemplo de Ourensanía deste intelectual e de Antón Losada Diéguez e o seu compromiso coa terra. “Este centro social e cultural de Boborás -dixo- deberá manter o lume vivo da súa memoria, o seu compromiso de fillos dun tempo e dunha terra; ou o que é o mesmo, o orgullo da ourensanía e o sentimento de pertenza e leal compromiso con este país do noroeste peninsular, con esta nación cultural solidaria e integrada cos demais pobos de España, con esta patria á que eles serviron e á que nós, xunto cos devanceiros e cos que nos sucedan, chamamos Galicia”.

Baltar lembrou que “non por casualidade” Boborás reúne a dous grandes figuras da Galicia contemporánea: Losada Diéguez e Chamoso Lamas, “dous veciños de Boborás que aportaron ideas e materializaron accións a prol dunha Galicia autoidentificada como pobo diferenciado, un territorio con historia, con lingua propia e cunha cultura que Losada e Chamoso engrandeceron co seu traballo xeneroso”.

O presidente do goberno provincial salientou que eles “compartiron a beleza desta terra, coñecérona a fondo, unha experiencia enriquecedora que lles valeu para dar unha resposta, para aportar a súa idea de Galicia”.

De Losada dixo que foi un adiantado, un precursor. “Todo o movemento cultural e político galeguista da década dos anos 20 do século pasado non tería sido como foi se non fose por el”. “E así xurdiu –expresou Baltar-, grazas ao empuxe de Losada Diéguez, a revista Nós, cuxo centenario celebraremos a longo deste ano”. Referíndose a Chamoso Lamas destacou deste historiador, arqueólogo e investigador “a súa defensa do patrimonio histórico-artístico da nosa terra”. “Sen el non habería alicerces para o estudo das catedrais de Santiago, Lugo e Ourense. Sen o seu labor e a súa loita teimuda, o fenómeno Xacobeo e a cidade de Santiago non terían acadado o esplendor actual nin serían referente europeo e universal”.

Pola súa banda, o presidente do goberno galego, Alberto Núñez Feijóo, destacou a aposta da Xunta pola rehabilitación e recuperación de edificios en desuso para seguir dotando ao rural de máis servizos e oportunidades. “Con servizos para que todos aqueles que queiran vivir nel poidan facelo; e con oportunidades para todos aqueles que queiran vivir do rural”, abundou.

Cun orzamento total de preto de medio millón de euros, Feijóo salientou que a recuperación deste edificio xa existente –as antigas vivendas dos mestres do CEIP Nosa Señora de Xuvencos- mellorará a vida social e cultural dos veciños de Boborás, ao convertelo nun espazo aberto a todos, con distintos servizos como: unha ludoteca, o programa concilia, unha aula de atención temperá, unha aula CEMIT para a modernización e inclusión tecnolóxica, biblioteca, espazo de formación, un salón de actos e unha aula de música. “Todo iso dentro dun edificio respectuoso ademais co medio ambiente”, dixo, subliñando que esta obra conta cun plan de aforro enerxético, con actuacións para fomentar a reciclaxe de residuos e con accións de sensibilización ambiental.

VIDEOS