OS ALCALDES DA COMARCA DO RIBEIRO ACORDAN UNHA DECLARACIÓN INSTITUCIONAL DE APOIO Á FEIRA DO VIÑO DO RIBEIRO.
Na reunión, celebrada no Concello de Ribadavia, acordouse tamén constituir un grupo de traballo por parte dos alcaldes para achegar propostas encamiñadas a afrontar os retos de futuro da comarca do Ribeiro
Alcaldes e representantes institucionais dos concellos que conforman o territorio da denominación de orixe Ribeiro, mantiveron hoxe unha xuntanza de traballo no concello de Ribadavia na que aprobaron unha declaración institucional de apoio á Feira do Viño do Ribeiro.
Na declaración institucional consensuada, os alcaldes da comarca convidaron a toda a cidadanía da comarca do Ribeiro e a todo o sector vitivinícola a participar de xeito activo na 57 edición da Feira do viño do ribeiro, que se celebrará os días 1, 2 e 3 de maio de 2020, prar continuar contribuíndo a dignificar o traballo de tantas persoas que teñen centrado unha parte importante da súa vida en engrandecer o nome do Ribeiro.
Ademais, na reunión celebrada, os alcaldes da comarca acordaron constituir un grupo permanente de traballo para achegar propostas encamiñadas a afrontar os retos de futuro da comarca do Ribeiro, entre os que destaca de xeito fundamental recuperar o viño como motor económico da comarca e como peza fundamental para fixar poboación nos concellos da comarca.
O alcalde de Ribadavia, César Fernández, quixo agradecer a todos os alcaldes do Ribeiro que responderan á chamada do Concello de Ribadavia para manter este encontro e que apoien de xeito firme á Feira do Viño do Ribeiro, un evento que foi medrando ao longo dos anos froito dun esforzo colectivo de toda a comarca e de todo o sector vitivinícola.
DECLARACIÓN INSTITUCIONAL EN APOIO Á FEIRA DO VIÑO DO RIBEIRO.
Fai 56 anos que botaba a andar a Feira do Viño do Ribeiro, un evento que xurdiu coa intención de poñer en valor e potenciar un dos sinais de identidade fulcrais da nosa comarca, o viño do Ribeiro. Ao longo destes 56 anos teñen sido moitas as xeracións de persoas boas e xenerosas da comarca do Ribeiro que co seu esforzo e a súa dedicación contribuiron a que a Feira do Viño do Ribeiro se convertira no que hoxe é, un evento de trascendencia nacional que permite, non só exaltar o viño do Ribeiro, se non tamén colocar ao noso viño e ao noso sector primario en páxinas destacadas da prensa especializada a nivel nacional e internacional. O éxito acadado pola Feira do Viño do Ribeiro ao longo dos anos é froito dun esforzo colectivo de toda a comarca e de todo o sector vitivinícola por amosar a todo o mundo o mellor que temos no noso territorio. Como tal tarefa de traballo e esforzo colectivo, cómpre poñer en valor e apoiar de forma decidida aquelo polo que tantas persoas loitaron co seu esforzo e coa mellor das súas vontades, aínda que probablemente ese apoio sexa insuficiente para recoñecer todo o traballo feito pora tantas persoas a prol da comarca do Ribeiro.
Tendo presente o que acabamos de sinalar, os alcaldes, alcaldesas e representantes institucionais das entidades locais que conformamos este singular territorio do Ribeiro queremos mostrar o noso apoio firme e decidido á Feira do Viño do Ribeiro, un evento que neste ano cumprirá a súa 57 edición. Ademais, queremos convidar tamén a toda a cidadanía da comarca e a todo o sector vitivinícola a participar de xeito activo na Feira do viño do Ribeiro para, deste xeito, continuar contribuíndo a dignificar o traballo de tantas persoas que teñen centrado unha parte importante da súa vida en engrandecer o nome do Ribeiro.
