O “microgoberno” de Jácome e o PP únense de novo para “rexeitar” que se dote de orzamento unha sala de estudo de apertura permanente na biblioteca Nós

Por outra banda, a corporación do Concello de Ourense aprobou por unanimidade a proposta do grupo municipal socialista para a realización e o compromiso co IV Plan de Igualdade

Os socialistas tamén impulsaron unha iniciativa para garantir o dereito de acceso a unha vivenda digna que contou co rexeitamento dos concelleiros do Partido Popular

AVANTAR ACTIVIDADES

Os concelleiros do “microgoberno” de Jácome únense de novo ao Partido Popular para “rexeitar” que se dote de orzamento unha sala de estudo de apertura permanente –durante as vacacións e as fins de semana- na Biblioteca Nós. Un orzamento que suporía 144€ ao mes para as arcas municipais e que daría solución a unha “vella demanda” que veñen facendo dende o anterior mandato os socialistas ante a “grave falta de espazo” que precisan os estudantes e os opositores de Ourense, tal e como informou o concelleiro do PSdeG-PSOE, José Rúas. PP e DO amosan así, de novo, a “falta de compromiso” e a “falta de investimento” co manteñemento e a posta en funcionamento para os cidadáns coas dotacións millonarias. Os socialistas non poden comprender como tanto o anterior grupo de goberno como o actual “non ten feito nada ao respecto” cun asunto que se “aprobou xa por unanimidade” no 2019, como recordou o concelleiro.

O concelleiro Rúas pregúntase se a “nova política cultural da Xunta de Galicia é que os biblioteca non teñan sala de estudo” ante a afirmación realizada pola  concelleira do PP, Flora Moure, na que se refiriu a que as bibliotecas “non poden ser salas de lectura”. Así, os populares rexeitan tamén outra das propostas realizadas polo PSOE na moción e que supuña as “sinerxias entre administracións” votando en contra de que se realice un “convenio entre Concello e Consellería de Cultura” para que se poida levar a cabo esa dotación da sala de estudo –como sí acontece en Vigo e na biblioteca de Gaiás en Santiago de Compostela.

Jácome, Ojea e Ucha pola súa banda, tamén se abstiveron no “compromiso e a loita do Concello” pola “posta en valor do complexo cultural de San Francisco” e o nomeamento como Praza da Segunda República ao Campo de Aragón pese a que se ten aprobado por unanimidade do pleno tanto durante o anterior mandato coma dende o inicio de este.

Unanimidade da corporación para o desenvolvemento do IV Plan de Igualdade

A corporación do Concello de Ourense aprobou por unanimidade a proposta do grupo municipal socialista para a realización e compromiso co IV plan de Igualdade do Concello o cal establecerá “unha visión estratéxica e común para eliminar as desigualdades e promover a igualdade en tódalas áreas municipais para incorporar a estratexia de xénero” tal e como defendeu a concelleira Conchi García, quen explicou que se trata dun “proceso de traballo para dar continuidade ao plan que se ven desenvolvendo e que finaliza o 31 de decembro.

A concelleira destacou que para o grupo socialista é de “vital importancia” apostar por “políticas de igualdade comprometidas” e un plan con “maior implicación do Concello e da sociedade” para que a ciudadanía participe das súas políticas públicas. Deste xeito, se facilitaría a recollida de aportacións e “involucrando aos diferentes movementos feministas e asociativos de mulleres cun plan máis eficiente”. Así, o Concello deixaría a un lado o “desleixo coa linguaxe inclusiva e a igualdade” como acontece na actualidade como Centro de Información á muller o cal necesita de “persoal e de especialización”, concluía Conchi.

Impulsamos unha moción para garantir o dereito de acceso a unha vivenda digna rexeitado polo PP

Os socialistas tamén impulsaron unha iniciativa para “garantir o dereito de acceso a unha vivenda digna” e un parque público de aluguer que “evite a especulación que se produce no mercado ourensán” y que pedía que a “Xunta dese un paso máis para que se implique coa vivenda digna” ante a “situación problemática que se está a dar na actualidade”, como defendeu o voceiro municipal Rafael Villarino. O texto foi aprobado cos votos de PSOE, BNG, Ciudadanos e os tres concelleiros do “microgoberno” e os votos en  contra do Partido Popular.

A moción evidenciaba “o desleixo continuado da dereita” coas políticas públicas nesta materia e ao seu “estreito abrazo á especulación”, polo que instaba á Xunta a “impulsar políticas que garantan o acceso da cidadanía a unha vivenda digna, combatendo especialmente o uso da vivenda como un ben especulativo”. Tamén reclamaba o “impulso prioritario do parque público de aluguer”; a “mobilización do gran parque de vivenda desocupada”; e “unha xestión máis eficiente, implantando modelos que se adecúen ás necesidades da poboación”.