Patricia Torres nomeada para a Comisión Organizadora do 17º Congreso do PP

O PPdeG valorará a Pepa Pardo como presidenta da Comisión Organizadora dun 17º Congreso que tería lugar en Pontevedra

Publicidade

A proposta será sometida á opinión da Xunta Directiva do partido, que se reunirá en Santiago este martes

  • Sandra Vázquez sería vicepresidenta e Rosa Gallego secretaria dun órgano con pleno de presenza feminina e cunha idade media por debaixo dos 39 anos

O Partido Popular de Galicia reúne este martes a súa Xunta Directiva para formalizar a convocatoria do 17º Congreso do PPdeG, unha cita que foi posposta por mor das restricións derivadas da pandemia e que agora reactívase coa finalidade de actualizar ideas e equipos no seo do partido. Nese encontro é preceptiva non só a autorización para iniciar os trámites para celebrar o Conclave senón tamén a adopción de algúns acordos.

Por exemplo, haberá que fixar data e lugar de celebración. A proposta será facelo os días 16 e 17 de xullo (45 días despois da celebración desta Xunta Directiva e de acordo aos estatutos do propio partido no referido a un Congreso ordinario) na cidade de Pontevedra. Convén lembrar que dende que Alberto Núñez Feijóo é presidente o PPdeG ten celebrado congresos en 2009 (A Coruña), en 2012 (Lugo) e en 2016 (Ourense), polo que agora apóstase por facelo na provincia pontevedresa.

Ademais, a Xunta Directiva terá que avaliar a proposta da dirección do partido no referido á Comisión Organizadora do Congreso (COC), e que opta neste caso por nomear presidenta da mesma a Pepa Pardo, concelleira na cidade de Pontevedra, avogada e de 43 anos de idade.

Para o cargo de vicepresidenta proporase a Sandra Vázquez, deputada autonómica por Lugo, orixinaria de Vilalba e de 35 anos de idade; mentres para o de secretaria a Rosa Gallego (56 anos), concelleira e voceira do PP na Coruña.

O resto do listado está composto pola concelleira do PP en Lalín, Begoña Blanco (psicóloga, 35 anos); pola concelleira do PP en Camariñas, Paula Mouzo (34 anos); pola coordinadora de NNXX, Eugenia Vázquez (avogada, 31 anos); pola alcaldesa de Larouco, Patricia Lamela (40 anos); e pola rexedora de Boborás, Patricia Torres (37 anos).

Desta forma, o PPdeG encarga a organización deste evento a un grupo de persoas novas, con ampla traxectoria no partido, e que deben xogar un papel importante tanto internamente como de portas para fóra.

Máis alá das persoas que dirixan os preparativos deste evento, a Xunta Directiva tamén terá que formalizar unha proposta sobre as ponencias que preceptivamente se levan a este tipo de conclaves. Neste caso, a proposta será traballar en tres direccións: Os retos dunha Galicia que quere máis emprego e menos impostos, na que se abordará non só a política laboral e fiscal que precisa a Comunidade senón tamén os retos industriais que afronta o país e os desafíos que teñen os sectores produtivos galegos en xeral, e a pesca, a gandería e a agricultura en particular. Os relatores serían Borja Verea (40 anos), María Ramallo (50 anos), Marta Nóvoa (40 anos) e Antonio Ameijide (35 anos).

A segunda delas tería por título Servizos públicos de calidade para unha sociedade plural e acolledora, que tratará as necesidades da educación, a sanidade e da axuda, e a integración a aqueles que necesitan ás administracións e aos partidos políticos para poder afrontar os retos da Galicia de hoxe. Os encargados da elaboración deste documento serían Marta Fernández-Tapias (46 anos), Martina Aneiros (43 anos), César Fernández (41 anos) e Cristina Sanz (50 anos).

A terceira ponencia, Un partido aberto, accesible e participativo, abordará o réxime interior do PPdeG e a actualización dos seus estatutos de cara a seguir avanzando ao mesmo ritmo que a sociedade á que representamos. Os poñentes propostos serán Paula Prado (50 anos), Javier Castiñeira (46 anos), José López Campos (47 anos) e Marisol Díaz (54 anos).

Todos estes acordos serán sometidos ao criterio dunha Xunta Directiva na que intervirán o secretario xeral, Miguel Tellado, e o presidente do partido, Alberto Núñez Feijóo.

UN CONCLAVE CENTRADO NAS IDEAS

Os populares galegos queren que o 17º Congreso do partido non sexa un mero trámite interno senón unha celebración, un espazo de diálogo coa súa militancia, un momento para o debate e unha oportunidade para acompasar a formación a unha sociedade en constante evolución.

Así mesmo, este non será un conclave centrado nos nomes, senón principalmente nas ideas co obxectivo de recoller o pulso da rúa, consolidar o proxecto do PPdeG e facer fronte aos grandes retos da sociedade post-pandemia.