Emilio González organiza coas forzas de seguridade o operativo contra a pandemia na provincia de Ourense

O subdelegado do Goberno en Ourense, Emilio González, presidiu hoxe a reunión coas forzas de seguridade para organizar o operativo encargado de velar polo cumprimento da normativa establecida para a provincia polas autoridades sanitarias. A reunión de coordinación celebrouse na Subdelegación do Goberno coa participación de mandos da Garda Civil, da Policía Nacional, da Policía Autonómica e da Policía Local de Ourense.

O subdelegado do Goberno sinalou que as Forzas e Corpos de Seguridade do Estado continúan coas tarefas de vixilancia e información, en tanto continúen vixentes as restricións para evitar a propagación do coronavirus, e insistiu na necesidade de concienciar á cidadanía para o cumprimento das mesmas.

Así, na reunión acordouse intensificar o seguimento en zonas de ocio da cidade de Ourense nas que se congrega maior número de persoas mediante operativos de vixilancia conxuntos entre a Policía Nacional, a Policía Autonómica e a Policía Local, especialmente durante as fins de semana con actuacións preventivas prestando especial atención ás aglomeracións e ao control dos botellóns. Pola súa banda, a Garda Civil reforzará os dispositivos de control nas zonas de ocio das principais localidades da provincia coa mesma finalidade.

Publicidade Premer na Imaxe

Emilio González subliñou que “a pandemia continúa presente e, aínda que a vacinación vai a bo ritmo, segue existindo risco de brotes, polo que é preciso recalcar a necesidade de manter a prudencia e respectar as medidas de autoprotección para evitar volver atrás”.

Durante a xuntanza tamén se fixo balance das actuacións levadas a cabo polas forzas e corpos de seguridade nos últimos dezaseis días para garantir o cumprimento das medidas ditadas polo Goberno autonómico. Así, entre o 15 e o 30 de xuño a Garda Civil e a Policía Nacional realizaron 541 controis e 322 inspeccións en establecementos de hostalaría. Nos dispositivos identificouse a 1.607 persoas e controláronse 1.200 vehículos. Como consecuencia destes controis, na provincia formuláronse 153 propostas de sanción por parte da Garda Civil e da Policía Nacional.