O PsdeG reproba o “fraudulento despilfarro” de millóns de euros do erario municipal tralo “estrepitoso fracaso” do centro de intelixencia artificial de Jácome

IES CHAMOSO LAMAS

Os socialistas acusan ao alcalde de malversar caudais públicos e anuncian que solicitarán de forma urxente un informe de intervención municipal cuantificando os gastos relativos a persoal e dotacións
Lembran que o alcalde desmantelou un equipamento fundamental como ‘La Molinera’ para financiar o desorbitado prezo dun proxecto “inviable, caprichoso e totalmente alleo ás competencias municipais”

O PSdeG-PSOE de Ourense reproba o
“fraudulento despilfarro” de millóns de euros das arcas municipais tralo
“estrepitoso fracaso” do Centro de Intelixencia Artificial de Gonzalo Pérez
Jácome e acusa ao alcalde de “malversar caudais públicos nun proxecto
inviable, caprichoso e totalmente alleo ás competencias municipais”.
Así as cousas, dende o grupo socialista adiantan que solicitarán, de xeito
urxente, un informe de intervención municipal cuantificando os gastos relativos
a persoal e dotacións da defunta infraestrutura, co obxectivo de reclamar
responsabilidades.
“Basta xa de malversar cartos públicos sen consecuencias”, manifestou o
voceiro socialista, Rafa Villarino. “Todos sabemos que Jácome é unha persoa
carente de capacidade de planificación, sen perspectiva e ao que o único que lle
interesa realmente é o titular, pero neste caso ese titular é moi caro porque xa
levamos enterrado millóns de euros nunha infraestrutura municipal que todo o
mundo sabía que estaba condenada ao fracaso, incluso o propio alcalde”.
Dende o grupo municipal socialista lembran tamén que o alcalde desmantelou
un equipamento singular, histórico e fundamental como era o centro de
coñecemento ‘La Molinera’, polo que “loitaron e traballaron representantes
municipais de distintas cores políticas” para poder financiar “o desorbitado
prezo” dun proxecto caprichoso e delirante, con competencias enmarcadas no
ámbito universitario.
“Como de costume, o alcalde busca escusas para non recoñecer a súa propia
culpa, neste caso escudándose na falta de apoios externos para dar viabilidade
a este proxecto, pero a realidade é que estamos ante a crónica dunha morte
anunciada”, conclúen.