O delegado territorial da Xunta en Ourense, Gabriel Alén, desprazouse esta mañá, acompañado do presidente de Aspamadis, Manuel Marín á parroquia de Cantoña, en Paderne de Allariz, para supervisar os traballos de rozas, limpeza e xestión da biomasa, que persoal desta asociación están a desenvolver en colaboración con SEAGA.
O delegado territorial, que tamén ía acompañado do alcalde, José Manuel Fernández, explicou que os traballos que executan estes cinco traballadores en dúas xornadas semanais de traballo (mércores e venres) están concentrados nos concellos de A Merca e Paderne de Allariz, zonas próximas ao seu centro operativo (Ourense e concellos próximos). As actuacións desenvolvidas neste ano, dende xuño, están emprazadas nas parroquias de A Merca e A Mezquita, onde executaron 4,80 ha de rozas, e nas parroquias de Cantoña e Solbeira, en Paderne de Allariz.
O representante do Goberno galego aproveitou a súa visita para anunciar a recente publicación no Diario Oficial de Galicia dunha nova convocatoria de axudas dirixidas a favorecer a empregabilidade das persoas con discapacidade a través dos centros especiais de emprego (CEE). O Goberno destinará 24,1 millóns de euros no período 2022-2023 a estes apoios, unha contía que supera nun 20,89% o orzamento inicial da edición anterior e coa que se espera poder beneficiar a máis de 3.700 persoas traballadoras con discapacidade e crear máis de 100 postos de traballo indefinido.
Aspamadis ven sendo beneficiaria desta liña de axudas pola que nos dous últimos anos recibiu máis de 30.000 euros.
Reunión co alcalde
O delegado territorial da Xunta, Gabriel Alén, mantivo na Casa do Concello un encontro co alcalde, José Manuel Fernández, onde analizou as principais demandas deste municipio en relación á Administración autonómica. Así, durante a xuntanza fixeron repaso dos grandes proxectos e necesidades que dependen da Xunta de Galicia.
Gabriel Alén puxo en valor os recentes investimentos da Xunta de Galicia no concello como foron a achega de 275.000 euros da Consellería de Infraestruturas e Mobilidade, a través de Augas de Galicia para o abastecemento de auga do núcleo de San Cristovo; a concesión de axudas do Plan de Mellora de camiños municipais a parcelas agrícolas de máis de 30.000 euros da Consellería de Medio Rural; os 28.300 euros da Vicepresidencia segunda e Consellería de Presidencia, Xustiza e Deportes para obras de accesibilidade da Casa do Concello, ou os 28.000 euros da Consellería de Emprego e Igualdade para o programa de apoio aos CIMs.