O grupo Lubicáns ofrecerá este xoves, a partir das 20,00 horas, o concerto “Historias dos instrumentos musicais na tradición galega”, un repertorio bailable instrumental galego, con pezas recollidas na Limia polo Arquivo Castro Vicente e tamén aprendidos de referentes da música tradicional ourensá
O salón de actos do Centro Cultural Marcos Valcárcel acolle este xoves, 15 de decembro, a partir das 20,00 horas un concerto didáctico gratuíto dos Lubicáns, programado polo Obradoiro de instrumentos musicais da Deputación de Ourense como actividade de Nadal.
En “Historias dos instrumentos musicais na tradición galega”, os Lubicáns ofrecerán unha repertorio bailable instrumental galego -muiñeiras, xotas, valses, pasodobres, polcas…-, recollidos principalmente na Limia polo Arquivo Castro Vicente durante os últimos trinta anos, e tamén aprendidos de referentes da música tradicional ourensá como Faustino Santalices, Modesto Sánchez, Ermelinda do Muíño, Faustino Luis Seoane ou Paco de Escornabois.
Durante hora e media de concerto didáctico, os Lubicáns repasarán a tradición dos instrumentos de vento en Galicia -frautas, pínfanos, frauta de tres buratos…-; instrumentos de palleta libre -acordeón diatónico, concertina…-, a trompa, gaitas antigas ou variedades de tambor.
O grupo falará tamén da música dos cegos e os seus instrumentos, e reflexionará como en cada sociedade e época se adoptan distintos instrumentos para as súas músicas, ou se crean novos instrumentos. Todo elo combinado con historias e curiosidades.
O grupo está formado por Félix Castro -gaitas, acordeón diatónico, concertina-; Cástor Castro -frautas, trompa…-; Marcos Saburido -tambor e caixa-; Diego Iglesias -bombo-, e Soco Rúa, na pandeireta.
Con esta formación, Lubicáns pretende, segundo sinalan eles mesmos, “revalorizar e difundir o repertorio e estilo propio ourensán”. O nome do grupo, Lubicáns, é, explican, “a denominación que se lle dá na Limia e parte de Zamora ao lince, animal de natureza fuxidía e case invisible. Como foron as nosas músicas durante moito tempo”.
