Zona Franca de Vigo anima aos empresarios do Carballiño a presentar os seus proxectos ao Consorcio

Os empresarios do Carballiño coñeceron hoxe de primeira man as posibilidades que ofrece o Consorcio da Zona Franca de Vigo para as súas empresas, en apoio á identificación de solo empresarial, proxectos, financiamento ou programas de aceleración e internacionalización. O delegado do Estado en Zona Franca, David Regades, mantivo un encontro con empresarios do municipio, na casa consistorial do Carballiño, acompañado polo alcalde, Francisco Fumega.

David Regades destacou que “os instrumentos da Zona Franca están ao servizo das empresas para crear emprego” ademais de subliñar que “esta reunión é un exemplo de que nos poden solicitar este tipo de reunións para coñecer que ferramentas ten o Consorcio. Ferramentas que van dende a identificación de solo empresarial, o apoio ao capital risco, coa empresa Vigo Activo, ata os programas de aceleración de proxectos empresariais e internacionalización”, destacou.

AVANTAR ACTIVIDADES

O alcalde, Francisco Fumega, asegurou que “é unha iniciativa que permite reforzar o tecido empresarial do concello e consolidar as posibilidades de potencialo e amplialo, a través de mecanismos que xa están a dar os seus froitos noutros concellos galegos”.

No Carballiño reuníronse representantes de empresas de distintos sectores do municipio, que se interesaron especialmente polas ferramentas de financiamento do Consorcio, o acceso ao apoio á internacionalización ou as características do solo libre.

Ademais do alcalde, tamén acudiron outros membros do goberno municipal, como o concelleiro de promoción económica e técnicos deste departamento.

Previamente, David Regades mantivo unha reunión co goberno local na que coñeceu os seus plans de ampliación de solo empresarial e acordouse adiantar un convenio para que a Zona Franca poida prestar apoio técnico ao Concello de Ourense.

Na actualidade, o solo empresarial do concello está practicamente esgotado, á espera da posta en marcha dunha nova fase de ampliación do parque empresarial existente, incluído nas novas áreas empresariais de Galicia e cunha superficie de 1.500.000 metros cadrados. que se estenderá polos concellos do Carballiño e Maside

A Zona Franca de Vigo é unha institución pública dependente do Goberno de España, que desde 1947 traballa para promover o comercio internacional e o desenvolvemento económico. Xestiona unha zona franca con todas as vantaxes para a Importación/Exportación, é o principal promotor de infraestruturas empresariais, fomenta a innovación e o emprendemento e xestiona un volume de activos de 520 millóns de euros. Os seus seis parques empresariais (Balaídos, Bouzas e PTL en Vigo, A Granxa en Porriño, Porto do Molle en Nigrán e Plisan en Salvaterra-As Neves) teñen 8 millóns de metros cadrados. Son 705 as empresas que dan emprego a máis de 20.000 persoas.