O Servizo de Emerxencias do Carballiño estrea novas instalacións construídas polo concello. Está emprazado no antigo Campo da Feira e dispón de garaxe para vehículos, cabina de recarga de botellas para incendios, zona de lavandería, dúas habitacións, dous baños, sala de xuntas e cociña, entre outras dependencias.
O cadro de persoal, que aumentou de 8 a 16 efectivos no último mandato, xa conta cunha nave adaptada para un equipo que traballa 24 horas os 365 días do ano.
Contou cunha inversión de preto de 160.000 euros, que contou cunha subvención da Xunta de Galicia de 60.000 euros e o restante, de inversión municipal. O gasto para o equipamento ascendeu a 25.000 euros.
O seu cambio de ubicación débese a que a Axencia de Protección da Legalidade Urbanística obrigou ó derrubo da antiga nave por estar construída en terreo do Sistema Xeral de Zonas Verdes.
