O delegado territorial da Xunta en Ourense, Gabriel Alén, desprazouse esta mañá a un establecemento comercial da cidade, ‘Intersport Bouso’, para presentar o programa Bonos Activa Comercio da Xunta de Galicia.
O delegado subliñou que a Consellería de Economía, Industria e Innovación destina 2,5 millóns de euros a este programa co obxectivo de incentivar a demanda e atraer nova clientela aos establecementos de proximidade. “Con esta iniciativa -destacou Gabriel Alén- coa que se prevé mobilizar 8,5 millóns de euros en vendas, ten tamén por obxectivo contribuír a reducir o impacto da inflación das familias”. Cada persoa pode descargar na web www.bonosactivacomercio.gal un bono desconto de 30 euros para as compras que realicen nos comercios adheridos, que suman xa máis de 900 na provincia de Ourense.
Así mesmo, o representante do Goberno galego afirmou que “esta iniciativa de dinamización permitirá incrementar as vendas do comercio, ao tempo que os bonos de desconto outorgarán unha maior capacidade de compra aos consumidores”.
Gabriel Alén detallou que os bonos teñen formato dixital QR e están dispoñibles para a súa utilización nunha aplicación móbil. Só se permite descargar un único bono por persoa, e o importe vaise reducindo en función do valor da compra. Así, ás compras iguais ou superiores a 20 euros e inferiores a 30 euros corresponderalle un desconto de 5 euros. A rebaixa será de 10 euros para as compras iguais ou superiores a 30 euros e inferiores a 50 euros. A partir desta cantidade, o desconto alcanzará os 15 euros.
Como na edición anterior deste ano non se limitará o número de usuarios que poden descargarse os bonos (un por persoa), senón que cando o importe total dos descontos realizados alcance os 2,5 millóns de euros, os bonos descargados xa non se poderán utilizar. Os bonos estarán dispoñibles para a súa descarga e uso por parte dos consumidores ata o 31 de decembro, salvo esgotamento previo do orzamento destinado. Pola súa banda, os comercios que se queiran adherir a esta iniciativa poderán facelo ata o 15 de decembro.
Con esta nova edición a Consellería de Economía, Industria e Innovación amosa o seu compromiso tanto co comercio local como coas persoas consumidoras convocando este programa que sempre tivo unha repercusión moi positiva. Na nova edición mobilizáronse máis de 2 millóns de euros na provincia de Ourense
De feito, desde a súa posta en marcha no ano 2021 xa se mobilizaron preto de 54 M€ neste sector favorecendo máis de 950.000 transaccións nos establecementos comerciais.
