Nun encontro que mantiveron diferentes integrantes da lista para as vindeiras eleccións autonómicas, con representantes do Foro Liceo, expuxeron a necesidade de cambiar a dinámica para mellorar a calidade de vida da cidadanía e atraer turismo
A derogación ou modificación da lei de aproveitamentos termais da Xunta, a necesidade dun plan de vivenda e rehabilitación para a capital ou o desenvolvemento urbanístico e a recuperación do casco histórico foron outros dos asuntos que se trataron
Ourense, 25 de xaneiro de 2024. Integrantes da candidatura do PSdeG á Xunta de Galicia mantiveron esta mañá un encontro con representantes do Foro Liceo para abordar diversas problemáticas nas que Ourense leva sumida demasiado tempo. As números un e tres e cinco da lista dos socialistas pola provincia, Carmen Rodríguez, Aurea Soto e Xurxo Doval; subliñaron que o vindeiro goberno autonómico ten que equilibrar a balanza para que remate o modelo a dúas velocidades do PP de Rueda e Feijóo.
Neste senso, puxéronse sobre a mesa as necesidades que presentan tanto a cidade como a provincia no que aos seus recursos termais se refire. “Claro que é imprescindible un compromiso económico para impulsar novas infraestruturas termais, pero non o é menos revitalizar as xa existentes que permanecen pechadas ou a medio gas”, indicou Carmen Rodríguez Dacosta. Todo co obxectivo de explotar a riqueza da que dispón Ourense para atraer turismo á vez que se mellora a calidade de vida dos ourensáns e ourensás.
A derogación ou modificación da lei de aproveitamentos termais da Xunta; a necesidade dun plan de vivenda e rehabilitación para a capital; o desenvolvemento urbanístico e a recuperación do casco histórico; a potenciación do campus universitario co soterramento da avenida Otero Pedrayo ou mellorar a conectividade con Lugo e Valdeorras foron outros dos asuntos que se puxeron sobre a mesa.
