Os integrantes do Servizo Municipal de Emerxencias do Carballiño decidiron convocar unha concentración para o vindeiro sábado, día 30 de agosto, ás 12,00 horas na Praza do Emigrante. Denuncian que “o Goberno municipal está desmantelando o Servizo silenciosamente, por afogamento, xa que non cumpren coas sentenzas xudiciais que obrigan a dotar de equipos de protección, non cubren baixas nin
vacantes e seguen sen convocar mesas de negociación para buscar un consenso nas melloras reclamadas”, tal e como afirma Sonia González, voceira destes traballadores do Concello.
“A situación é límite, tan só quedan nove persoas das 20 que recoñece a relación de postos de traballo, non se mercou nin un só equipo de protección individual aínda que hai unha sentenza sobre isto, seguimos cobrando o SMI e, por se non fora pouco, atácase a nosa profesionalidade constantemente e menosprézase o noso traballo”, engade Sonia González.
Hai ano e medio que os membros deste Servizo decidiron dar o paso e denunciar publicamente as carencias do mesmo, algo que xa levaban outro ano e medio denunciando internamente sen obter nunca resposta. Reclaman tres cuestións básicas: a dotación de medios materiais e de equipos de protección para o desenvolvemento dunhas tarefas que son de alto risco; a cobertura da totalidade das prazas que recoñece a RPT do Concello; e melloras salariais e laborais. Nestas melloras contemplan, entre outras, un incremento salarial, “e o recoñecemento da súa profesión como bombeiros e bombeiras, para ter acceso así a coeficientes reductores para a xubilación ou mesmo o acceso a unha segunda actividade, nun traballo de evidente esixencia física e mental”.
A convocatoria de concentración para o vindeiro sábado está secundada polos sindicatos CSIF, UGT, CC.OO., CIG e CNT, “e tórnase nunha medida desesperada ante o desmantelamento dun servizo fundamental para a atención das emerxencias na segunda vila por poboación da provincia de Ourense, e que ademais incluso presta servizo aos concellos limítrofes”, según subliñan dende o Grupo de Emerxencias.
