Baños de Molgas converteuse o sábado 27 de xuño no punto de encontro das agrupacións de Protección Civil de Galicia coa celebración das xornadas de convivencia no Santuario dos Milagres, unha cita que reuniu voluntarios e representantes institucionais nunha xornada dedicada á formación, ao intercambio de experiencias e ao fortalecemento da coordinación entre agrupacións.
O encontro tivo como principal obxectivo reforzar a colaboración entre os distintos equipos de Protección Civil, fomentar o compañeirismo e poñer en valor o labor altruísta que desenvolven os voluntarios ao servizo da cidadanía.
Ao longo da xornada desenvolveuse un completo programa de actividades que incluíu a recepción das agrupacións participantes, o acto oficial de benvida, exhibicións de medios e recursos, demostracións prácticas de intervención, actividades formativas, espazos para compartir experiencias entre os voluntarios, un xantar de confraternidade e o acto de clausura, no que se agradeceu o compromiso de todas as agrupacións asistentes.
Nas xornadas participaron tamén autoridades da Xunta de Galicia e representantes dos corpos e forzas de seguridade do Estado, entre eles a Policía Nacional, a Policía Autonómica, a Garda Civil de Tráfico, as unidades caninas e de montaña da Garda Civil e membros da Guarda Nacional Republicana (GNR) de Portugal. Estes últimos realizaron unha espectacular exhibición dun rescate en montaña, que espertou un grande interese entre os asistentes.
OS MELLORES ESTABLECEMENTOS
Entre os participantes destacou a presenza da Agrupación de Protección Civil de Sandiás, representada polo seu presidente, Fernando Gándara, quen participou activamente nesta cita xunto aos voluntarios da agrupación. A asistencia ao encontro permitiu seguir fortalecendo os lazos de colaboración con outros equipos da provincia e continuar apostando pola formación e a preparación permanente, aspectos fundamentais para ofrecer un servizo eficaz á veciñanza.
Ademais, a Agrupación de Protección Civil de Sandiás estableceu importantes vínculos de colaboración coa GNR portuguesa, especialmente orientados ás misións de rescate e ao intercambio de coñecementos e experiencias, abrindo novas vías de cooperación internacional que contribuirán á mellora da resposta ante situacións de emerxencia.
Fernando Gándara salientou a importancia deste tipo de encontros, asegurando que “ademais de favorecer a convivencia entre agrupacións, permiten compartir coñecementos, experiencias e boas prácticas que contribúen a mellorar a resposta ante calquera emerxencia“.
A participación de Protección Civil de Sandiás nesta convivencia reafirma o compromiso da agrupación co voluntariado, a cooperación institucional e a mellora continua, mantendo unha presenza activa en todas aquelas iniciativas que contribúan a fortalecer o sistema de protección e seguridade da cidadanía.
