O Servizo Galego de Saúde publicou a listaxe coas persoas que accederon á condición de pediatras con praza en propiedade na Área Sanitaria de Ourense, Verín e O Barco de Valdeorras, na convocatoria por concurso de méritos da Consellería de Sanidade para as prazas tipificadas como de difícil cobertura.
En Galicia cubríronse neste proceso un total de setenta prazas, cincuenta e oito para atención primaria e doce para hospitais comarcais. Estas cifras foron anunciadas polo presidente da Xunta, tras a última reunión do Consello da Xunta.
No caso da Área Sanitaria de Ourense, Verín e O Barco de Valdeorras, foron asignadas todas as prazas convocadas, tres nos hospitais comarcais e cinco en Atención Primaria (2 no Centro de Saúde de Verín, e 1 no Centros de Saúde de O Barco, 1 no Centro de Saúde de o Carballiño e 1 para os Centros de Maceda-Castro Caldelas-Trives).
Está previsto que unha vez publicado no DOG comece o prazo de toma de posesión previa á súa incorporación efectiva nos seus novos postos durante este mes de marzo.
Con esta incorporación dase resposta a parte das demandas da Plataforma na Defensa da Sanidade Pública do Carballiño, constituída precisamente para reclamar pola ausencia total de pediatras no Centro de Saúde tras a xubilación dunha das pediatras titulares.
