Nomeada a nova Dirección da ESAD de Galicia. Daniel G. Salgado será o novo
director da ESAD, cun equipo conformado pola dramaturga e actriz Vanesa
Sotelo na Xefatura de Estudos, a actriz Noelia Blanco na Secretaría académica e o
xestor cultural e dramaturgo Roberto Pascual na Vicedirección.
Cando a ESAD celebra o seu 20º aniversario, comeza unha nova etapa de oportunidades
cunha directiva composta, por vez primeira na súa historia, por profesorado do propio centro,
logo das dúas comisións de servizos dos anteriores directores, Manuel F. Vieites durante 16
anos e Roberto Relova nos últimos 4, a quen é preciso recoñecer a súa implicación na posta
en funcionamento, consolidación e progreso deste centro, único en Galicia.
A nova directiva da ESAD de Galicia, que xa comezou a traballar nas súas respectivas
responsabilidades, estará marcada polos tres grandes obxectivos que marcaron o proxecto de
Dirección presentado por Daniel G. Salgado: 1. A mellora da xestión e da calidade educativa,
- O impulso e acompañamento da transición á vida activa do alumnado e 3. O reforzo da
difusión e as relacións externas do centro e a participación.
Este novo período da escola que xa deu os seus bos froitos e evidencias de gran calidade
artística do seu alumnado titulado nas tres especialidades de Dirección escénica e
Dramaturxia, Interpretación e Escenografía, integrado en notables proxectos escénicos e
audiovisuais ou iniciativas propias no ámbito da creación, a investigación ou a pedagoxía
teatral, virá marcado pola nova normativa das ensinanzas artísticas superiores, aprobada nas
Cortes Generales hai un ano. Esta Lei inaugura un novo ámbito normativo, que equipara
formalmente as ensinanzas superiores de Arte Dramática á formación universitaria, regulando
os seus estudos de grao e posgrao, así como impulsando programas de doutoramento en
colaboración coas Universidades. A Lei concede a partir de agora maior autonomía aos
centros, permitíndolles adoptar enfoques interdisciplinares, abrir vías de cooperación con
outros centros, crear campus das artes ou ofertar estudos semipresenciais, virtuais ou duais.
Os avances, que precisarán dun desenvolvemento normativo propio por parte da
Administración galega, tamén alcanzan ao profesorado e ao alumnado. Todos eles obrigarán á
ESADG a afrontar nos vindeiros anos un intenso período de transformación que marcará as
futuras décadas da formación escénica galega, nas cales o centro se propón manter unha
estreita colaboración cos organismos directamente implicados, nomeadamente coa
Consellería de Educación e os seus centros educativos, o executivo galego, o Consello da
Cultura Galega e o conxunto de axentes do sector cos que a escola se propón establecer
convenios de prácticas do alumnado e enfoques estratéxicos para a mellora constante do
tecido artístico.
Paralelamente, este novo proxecto de dirección entende como liñas prioritarias tamén a
mellora das instalacións, o fomento das relacións e da proxección social das actividades do
centro na súa contorna más inmediata e a creación de iniciativas sólidas e solventes respecto
ESADg
á oralidade do galego, como un Laboratorio da Fala escénica e novas colaboracións con
institucións como a RAG, o ILG, AGAPI, CDG, Escena Galega, Aaag ou o CSAG (antiga
CRTVG), para o fomento das competencias do alumnado nesta área pedagóxica prioritaria.
Todas estas accións e planificación será levada a cabo por un equipo sólido e moi respectado
no ámbito académico e cultural. O Director, Daniel G. Salgado é Doutor pola Universidade
de Vigo, cunha investigación sobre a Dirección actoral como disciplina académica. É titulado
en Dirección escénica e Dramaturxia polo Institut del Teatre de Barcelona e traballou como
director de escena para diversas compañías públicas e privadas, como o CDG, Sarabela
Teatro, o TNC, etc. Desempeñou postos directivos en diferentes etapas da ESAD e ten
publicados diversos artigos especializados e manuais como A dirección de actores na
editorial Galaxia.
Noelia Blanco foi alumna da ESAD de Galicia e na actualidade é profesora do
Departamento de Interpretación. Tamén é Arquitecta técnica e posúe un Máster en Enxeñería
da Edificación e Construcións Industriais e outro en Investigación Teatral. Ostenta a
responsabilidade da xestión económica e académica, tarefas que compaxina coa súa
actividade profesional como actriz, en compañías como ButacaZero, Inherente Teatro, etc.
Vanesa Sotelo é xornalista e Titulada Superior en Arte Dramática, recibou diversos premios
polo seu traballo como dramaturga (Premio María Casares por A lúa vai encuberta ou Unha
inimiga do pobo, Premio Abrente por Campo de covardes, Premio Mondoñedo 10 por Nome:
Bonita, Premi Josep Robrenyo por Memoria do incendio, etc.). Colaboradora en diversos
medios sobre temas escénicos (Artezblai, Revista Galega de Teatro, Nós Diario, etc.) e
colaboradora en varios proxectos teatrais en Portugal (Casa da Esquina de Coimbra, Teatro
Art’Imagem da Maia, etc.)
Roberto Pascual é Doutor en Estudos da Literatura e da Cultura pola USC, foi Director
Artístico da MIT de Ribadavia dende 2009 a 2024, membro do Consejo Artístico do INAEMMinisterio
de Cultura, do Consello da Cultura Galega e colaborador como divulgador ou
xestor cultural en diversos medios e organismos como a Radio Galega, a Deputación da
Coruña, a TVG, a Universidade Complutense ou o Instituto Cervantes. Como creador, gañou
o XX Premio Rafael Dieste en 2021 e participou en diversos foros internacionais das Artes
Escénicas.
PUBLICIDADE
---------------------------------------------------------------------------------------------------
