A Deputación de Ourense, a través da empresa mixta AquaOurense -formada pola propia institución provincial e por Viaqua- habilitou dous puntos de subministración de auga potable na praza de Viloira e no Parque Empresarial da Raña, no Barco de Valdeorras. O obxectivo é garantir o acceso á auga á poboación afectada polos cortes de servizo provocados polos recentes incendios forestais na provincia.
Os veciños poden acudir a estas fontes portátiles a cargar as súas garrafas ou botellas de auga, mentres os equipos da empresa traballan para restablecer o servizo habitual con todas as garantías sanitarias esixidas pola Consellería de Sanidade.
Os incendios afectaron ás fontes de abastecemento, deixando sen auga aos concellos cuxa xestión depende do Consorcio de Augas de Valdeorras, como é o caso de Rubiá, A Rúa, Petín e Vilamartín de Valdeorras, ademais dalgunhas zonas do Barco.
Con esta acción, a Deputación de Ourense reafirma o seu compromiso coa cidadanía, colaborando coas administracións implicadas para asegurar un servizo esencial nun momento de gran dificultade para a comarca.
