Ribadavia gaña o Premio Rexional Pueblos Mágicos de España 2027 e consolídase como referente turístico e patrimonial de Galicia

---------------------------------------------------------------------------------------------------------

---------------------------------------------------------------------------------------------------------

Ribadavia vén de ser distinguida co Premio Rexional Pueblos Mágicos de España 2027, converténdose na localidade gañadora de Galicia nesta edición dos galardóns organizados pola iniciativa Pueblos Mágicos de España.

O recoñecemento foi dado a coñecer este luns, 16 de novembro, tras finalizar o proceso de votación popular, desenvolvido entre os días 2 e 13 de novembro de 2026. Durante este período, veciños, visitantes e seguidores da iniciativa tiveron a oportunidade de apoiar os seus destinos favoritos, sendo Ribadavia a localidade elixida para representar a Galicia nos premios rexionais.

Este galardón supón un novo impulso para a proxección turística de Ribadavia e un recoñecemento ao seu extraordinario patrimonio histórico, cultural e monumental, que converte a vila nun dos destinos máis singulares de Galicia.

A organización dos premios destaca especialmente a riqueza histórica de Ribadavia, visible nas rúas do seu casco histórico, na súa emblemática xudaría e no seu castelo, elementos que constitúen algúns dos principais sinais de identidade da vila.

Este recoñecemento pon tamén de manifesto o atractivo dun destino que soubo conservar a súa esencia e manter vivas as súas tradicións, combinando o valor do seu legado histórico cunha ampla oferta cultural, gastronómica e enoturística, estreitamente vinculada á tradición vitivinícola do Ribeiro.

O Premio Rexional Pueblos Mágicos de España 2027 representa, ademais, unha oportunidade para continuar reforzando a promoción de Ribadavia como destino turístico de referencia, favorecendo a súa visibilidade e contribuíndo á posta en valor dos recursos culturais e patrimoniais do municipio.

O apoio recibido na votación popular constitúe un motivo de orgullo para Ribadavia, ao reflectir o cariño e o interese que esperta a vila tanto entre a súa veciñanza como entre as persoas que a visitan e coñecen a súa riqueza patrimonial.

Con este premio, Ribadavia érguese unha vez máis como un dos grandes referentes do turismo cultural e patrimonial de Galicia, sumando un novo recoñecemento que contribúe a seguir dando a coñecer a historia, a identidade e os atractivos da capital do Ribeiro.

PUBLICIDADE---------------------------------------------------------------------------------------------------