O subdelegado do Goberno en Ourense, Emilio González, e a alcaldesa de Allariz, Cristina Cid, copresidiron esta mañá a reunión da Xunta Local de Seguridade, na que se realizou unha análise e valoración da seguridade cidadá, así como dos datos de violencia de xénero no concello.
No tocante á seguridade cidadá, o subdelegado do Goberno indicou que o índice de criminalidade en Allariz mantense en niveis baixos, tanto con respecto ao ano 2020 como nos primeiros meses do 2021, e destacou o incremento da actividade da Garda Civil en canto ao número de investigados, que redundou no crecemento da taxa de esclarecemento de delitos.
Sen embargo, Emilio González sinalou que no tocante aos delitos telemáticos estase a rexistrar un repunte e, neste sentido, alertou da “necesidade de que a cidadanía tome conciencia da importancia de poñer en práctica todas as medidas de seguridade posibles á hora de realizar compras por Internet”. A este respecto, o subdelegado do Goberno quixo trasladar á veciñanza as recomendacións máis habituais que realizan as Forzas e Corpos de Seguridade. “Non se deben facer compras sen comprobar que o facemos a través dunha web segura e nunca se deben facilitar datos persoais ou bancarios en resposta a correos electrónicos, chamadas ou mensaxes”.
Con respecto á cifra de infraccións administrativas, durante o ano 2020 no concello de Allariz produciuse un aumento, motivado en boa medida polos supostos de incumprimento da normativa decretada fronte a COVID-19 que deron lugar a propostas de sancións administrativas.
Así mesmo, na Xunta Local de Seguridade acordouse levar a cabo un plan de colaboración entre a Garda Civil, a Policía Local e Protección Civil, así como o incremento do número de dispositivos de vixilancia para garantir a seguridade cidadá no concello durante a época estival.
Por último, o subdelegado do Goberno salientou a colaboración existente entre a Garda Civil e a Policía Local de Allariz, aos que agradeceu os seus esforzos para asegurar o cumprimento das medidas sanitarias, ademais de garantir a seguridade cidadá.
VIOLENCIA DE XÉNERO E PLAN DIRECTOR
En canto aos datos presentados pola Unidade contra a Violencia sobre a Muller da Subdelegación do Goberno, actualmente no concello de Allariz hai seis casos activos no Sistema de Seguimento Integral nos casos de Violencia de Xénero (Sistema VioGén) e todos eles presentan risco non apreciado. Un dos casos conta con medidas xudiciais de prohibición de aproximación, mentres que os cinco restantes contan con medidas de prohibición de aproximación e comunicación.
Acerca do Plan Director para a Convivencia e Mellora da Seguridade nos Centros Educativos e nas súas contornas informouse de que se seguirán reforzando os mecanismos de comunicación e colaboración coa comunidade educativa por parte das Forzas e Corpos de Seguridade do Estado co obxectivo de pór a disposición dos centros educativos do concello diferentes conferencias e actividades sobre o uso das novas tecnoloxías; acoso escolar; consumo de drogas e alcol; condutas incívicas, violentas e vandálicas; racismo, xenofobia e intolerancia; e violencia de xénero, entre outras temáticas. Neste punto, fíxose especial fincapé na necesidade de impulsar a participación neste tipo de actividades dos proxenitores do alumnado.
Así mesmo, continuarase cos dispositivos de vixilancia por parte da Garda Civil e da Policía Local nas inmediacións dos centros educativos para previr o tráfico, consumo e tenencia de drogas, así como todo tipo de condutas violentas.
