Gabriel Alén reivindica o valor dos obradoiros de emprego tanto para as persoas desocupadas como para entidades locais promotoras

Esta mañá na clausura do obradoiro de emprego ‘Río Arnoia’ no Concello da Merca

O delegado territorial da Xunta en Ourense anunciou o inicio inmediato dunha nova edición desta iniciativa laboral, tamén baixo o formato de obradoiro dual e cunha duración de nove meses, grazas a un investimento de preto de 347.000€ por parte da Xunta

AVANTAR ACTIVIDADES

Gabriel Alén presidiu o acto de entrega dos diplomas aos 20 alumnos do obradoiro Río Arnoia no que a Consellería de Emprego e Igualdade investiu 346.946 euros

O delegado territorial da Xunta en Ourense, Gabriel Alén, clausurou esta mañá o obradoiro de emprego Río Arnoia no Concello da Merca e anunciou o inicio inmediato dunha nova edición desta iniciativa laboral, Río Arnoia igualmente baixo o formato de obradoiro dual e cunha duración de nove meses, grazas a un investimento de preto de 347.000€ por parte da Consellería de Emprego e Igualdade, no que participan tamén os concellos de Ramirás e Cartelle.

O delegado territorial reivindicou o valor dos obradoiros de emprego tanto para as entidades locais promotoras, “por canto levan a cabo proxectos que redundan en beneficio da zona na que se desenvolven” como “para os directamente beneficiados: as persoas sen emprego”.

Neste senso, destacou que non só proporcionan aos participantes traballo e un salario durante o período de duración da actividade, senón que ofrecen “unha formación teórica e práctica que lles permitirá reorientar a súa carreira profesional cara a actividades que acreditan unha notable demanda no mercado de traballo”.

O representante do Goberno galego, que estivo acompañado polos alcaldes da Merca, José Manuel Garrido; de Cartelle, Jaime Sousa e pola alcaldesa de Ramirás, Isabel Gil, lembrou que os alumnos reciben hoxe os seus certificados de profesionalidade, que teñen validez en todo o territorio nacional, expedidos polo Servizo Público de Emprego de Galicia. Estes documentos demostran a preparación e habilidades adquiridas, o que vai “incrementar moi significativamente a empregabilidade do alumnado”, e expuxo as vantaxes que supoñen os obradoiros de emprego como é a súa contribución a fixar poboación no rural. Neste senso, subliñou que para o Goberno galego o rural é unha prioridade.

Promovido polo concello da Merca, e no que participaron os concellos de Cartelle e Ramirás, este proxecto supuxo un investimento da Xunta de 346.946 euros. Os vinte alumnos-traballadores desenvolveron nestes nove meses as especialidades de actividades auxiliares en viveiros e centros de xardinería e operacións auxiliares de albanelería de fábricas e cubertas.

Actuacións

No Concello de Cartelle levaron a cabo actuacións e traballos no acceso e contorna en Fonte Ferra no núcleo de Nogueiró; acondicionamento de parque infantil en Santa Baia; mellora da área recreativa en Outomuro; mellora da contorna do centro ecuestre O Mundil; acondicionamento da fonte de Teixeira; rehabilitación do galpón para inseminación de gando en Outomuro; a construción de baños en área recreativa e acondicionamento da fonte en Ulfe; a limpieza e reparación de beirarrúas en Espiñoso, Outomuro, Nogueiró, Cartelle, Reigoso, Sande e Parvón; a rehabilitación de lavadoiro en Lamas de Outeiro; a reparación da fonte lavadoiro en Madarnás; o acondicionamento da poza en Sanguñedo; a restauración do galpón no campo da feira de Cartelle; o acondicionamento das áreas recreativas do Santo e Ponche Nova; e a construción dunha senda peonil en Nogueiró.

No Concello da Merca, rehabilitación de praza pública na Merca; a limpeza e recuperación de fonte lavadoiro e mina en Pereira de Montes; a mellora da fonte lavadoiro en O Casal; a reparación da fonte e acondicionamento de contorna en Salpurido; o acondicionamento de fonte lavadoiro en Froxás de Montes; a preparación de mina de auga e contorna en Froxás de Montes; actuacións en pista polideportiva en Zarracós.

E no Concello de Ramirás, rehabilitaron a antiga escola de Freas de Eiras.