O grupo rock Tequila combinará a música e a última tecnoloxía na Mobile Week Ourense

Barcelona, Ourense e Madrid serán as tres últimas oportunidades para ver á lendaria banda que introduciu o rock and roll en castelán no panorama musical español de finais da década dos 70

A música, co lendario grupo de rock Tequila, e o emprego da última tecnoloxía para crear un evento interactivo daranse a man o próximo 22 de novembro na cidade dentro da programación de actividades da Mobile Week Ourense. Un concerto que, na Praza Maior e a partir das dez da noite, “permitiranos demostrar como o uso da tecnoloxía pode engadir a unha cita musical todo un mundo de emocións expresadas polos asistentes”, destacou o presidente da Deputación de Ourense, Manuel Baltar, impulsor da celebración da Mobile Week na provincia en 2021, 2022 e 2023.

Manuel Baltar subliñou que a presenza de Tequila ten un triplo valor, “xa que a banda que introduciu o rock and roll en castelán a finais da década dos 70 non abandonará os escenarios sen actuar por primeira vez en Ourense, e supón ademais que o nome da cidade quedará gravado na historia musical española por ser o penúltimo concerto que o grupo ofrecerá en España”. Refírese así o presidente da Deputación ao “Adeus Tequila Tour”, a xira que a banda fundada por Afasto Estivel e Ariel Rot tivo que aprazar en 2020 pola pandemia e que finaliza en novembro coas actuacións en Barcelona (día 20), Ourense (22) e por último no Wizink Center de Madrid (24). Unha cita en Ourense que, segundo o propio Afasto Estivel, “será incrible e nun escenario como a Praza Maior, a única inclinada que hai en España”

Publicidade Premer na Imaxe

O terceiro aspecto “que fará deste concerto unha cita moi especial e lembrada”, destacou Manuel Baltar, será a súa celebración no marco dun evento tecnolóxico pensado para a cidadanía como é a Mobile Week. Así, durante a actuación de Tequila o público poderá expresar e compartir as súas emocións e experiencias, interactuando con todos os asistentes a través dunha pantalla “que pode ver, escoitar, sentir e vibrar coas reaccións dos participantes en tempo real”. E todo iso a través do hashtag # saltaconmigoOurense.

A Mobile Week, iniciativa promovida por Mobile World Capital Barcelona, e que en Ourense organiza a Deputación e a asociación Rede Mundo Atlántico, celebrarase en diversos escenarios da provincia do 19 ao 23 de novembro, nunha intensa axenda de actividades que serán dadas a coñecer o vindeiro luns, día 25, e que teñen como obxectivo celebrar unha semana de reflexión aberta ao redor da transformación dixital, sendo un punto de encontro para a cidadanía e de colaboración entre o mundo do emprendemento, a industria dixital, a ciencia, o pensamento e as industrias creativas.