Este venres día 27 de xaneiro o Cine Club proxecta unha película de Chad, cuxa filmografía rara vez chega ás nosas salas. “Lingui. Lazos sagrados” céntrase na historia dunha nai, Amina e a súa filla de 15 anos, María, que queda embarazada. O aborto está prohibido no seu país e condenado tamén pola relixión. Amina inicia así unha batalla que parece perdida de antemán.
A partir deste feito, o director Mahamat-Saleh Haroun constrúe unha película sinxela e rotunda, un canto á solidariedade e a complicidade entre as mulleres que resisten nun mundo dominado polos valores dos homes e o patriarcado. a película esteouse no Festival de Cannes, onde competiu pola Palma de Ouro.
Neste caso os dous pases do filme serán en versión orixinal subtitulada en español, xa que non existe copia dobrada. Coma sempre, ás 20:00 e ás 22:30 no Auditorio Manuel María do Carballiño.
