O presidente provincial, Luis Menor, asistiu no IES Martaguisela do Barco de Valdeorras a unha das actividades deste proxecto, a “Xincana non sexista”, na que participaron preto de medio cento de estudantes de 3º da ESO
“O traballo que fagades agora será clave para lograr unha sociedade mellor, máis xusta no futuro, e desde a Deputación queremos poñer o noso grao de area”, dixo Luis Menor ao alumnado
O Barco de Valdeorras, 11 de decembro de 2023.- O presidente da Deputación de Ourense, Luis Menor, visitou esta mañá o IES Martaguisela do Barco de Valdeorras para asistir a unha das actividades incluídas no programa “Nena e Deporte” para o fomento da igualdade de xénero no deporte en idade escolar.
Preto de medio cento de estudantes de 3º da ESO participaron no pavillón do centro nunha das actividades previstas no programa, unha “Xincana non sexista” que incluíu diversos xogos e adiviñas sobre profesións.
Trinta centros educativos da provincia van participar no programa “Nena e Deporte”, en colaboración coa firma “Gesto Deportivo”. Precisamente, a “Xincana non sexista” forma parte da fase 4 do plan, con probas deportivas que se realizan por equipos. Esta actividade permite mellorar as relacións do grupo; fomentar o traballo en equipo; concienciar sobre a importancia de facer sentir ben e iguais ás compañeiras e compañeiros; ou desprogramar o subconsciente de hábitos lingüísticos entre outras claves.
Luis Menor dirixiu unhas palabras aos participantes, destacando o apoio constante da Deputación ás actividades que promoven a igualdade, lembrando tamén I Concurso Provincial contra a Violencia de Xénero e dirixíndose ao alumnado díxolles: “Xa vos convido a participar na vindeira edición para implicarvos precisamente a vós nesta tarefa: facervos partícipes e conscientes desta problemática social”.
Tamén tivo Menor palabras de agradecemento ao profesorado polo seu traballo e implicación, “por sumarse a esta iniciativa e facela propia”. O presidente provincial concluíu a súa intervención cun especial fincapé cara o alumnado: “Quero animarvos a que participedes nesta actividade porque o traballo que fagades agora será clave para lograr unha sociedade mellor, máis xusta no futuro. A prevención que implantedes hoxe é fundamental para elo, e por iso desde a Deputación queremos poñer o noso grao de area”.
No acto desta mañá a xunto ao presidente provincial tamén estiveron presentes o alcalde de O Barco, Alfredo García; a alcaldesa de Carballeda de Valdeorras e deputada provincial delegada especial para Valdeorras, María del Carmen González, o deputado provincial Aurentino Alonso; a inspectora de Educación Eva Muñiz; o xefe territorial de Educación, Jorge Rubén Sampedro; a directora e vicedirector do instituto, María del Carmen Gamarra e David Ramos; así como o profesor de Educación Física, Antonio Morado.
