Pide que se deixe de afirmar por parte do PP que se vai ampliar o polígono, creando unha expectativa falsa, xa que estes terreos están na súa maioría en zona inundable.
Ribeiro en Común advirte que a forma máis fácil, económica, real e rápida é liberando parcelas xa existentes que están bloqueadas por propietarios privados. Algo que só pode facer a Xunta, que leva moitos anos negándose a liberalas.
Ribadavia a 3 de xuño de 2024.
Despois do Pleno desta semana, 30 de maio 2024, cando o noso grupo reprochou a inacción do goberno neste ano de lexislatura, a resposta do goberno local foi enviar unha nota de prensa na que volve anunciar que se vai ampliar o Polígono de Ribadavia.
Non é algo novo, o mesmo xa fixera fai 4 anos, no mes de xuño do ano 2020, cando tamén era alcalde César Fernández, anunciando un Convenio coa Xunta que o tempo demostrou era falso, tal e como xa denunciara o noso grupo.
Ribeiro en Común volve esixir que se deixe de mentir por parte do goberno do PP, xa que a maioría dos terreos destinados a ampliación do Polígono atópanse en zona inundable (Fase 3), polo tanto afirmar que se vai ampliar é mentirlle a cidadanía.
– Desbloquear parcelas xa urbanizadas que están en mans privadas.
Ribeiro en Común reclama, unha vez máis, que a XUNTA (propietaria do polígono) desbloquee os terreos industriais que xa existen na fase 1 do Polígono e que levan décadas bloqueados polos seus propietarios.
O noso grupo xa solicitara este desbloqueo no Parlamento Galego en 2016 e 2019, ao igual que o fixo desde o concello na pasada lexislatura, 2021-22, sen que a Xunta do PP accedera a esta petición.
O cinismo do PP é total neste asunto, levan anos anunciando a ampliación dunha Fase 3 que eles saben non é real, ao mesmo tempo que permiten que estes terreos xa industrializados continúen en esta situación de bloqueo, quizais a causa sexa que algún propietario destas parcelas está precisamente ligado a este mesmo partido.
Pedímoslle ao PP que deixe de permitir que estes terreos continúen parados, xa levan desde a inauguración do Polígono fai décadas sen destinar ao seu uso, a pesar de que foron construídos con diñeiro público.
A Xunta debe poñer fin a esta situación, pois Ribadavia precisa urxentemente ter solo industrial, e a día de hoxe a forma más tanxible e realistas de telo é a través da liberación destas parcelas.
