Desde o Colectivo Veciñal Carballiño fanse eco dunha queixa que, de xeito reiterado, están a recibir por parte dunha gran cantidade de cidadáns nestes últimos días, pola insoportable calor que teñen que soportar os pacientes e acompañantes que acoden ó Centro de Saúde da nosa vila. Subliñan que a situación, nestes días de altas temperaturas é insostible, sobre todo no PAC de Urxencias, onde ata o propio persoal padece as consecuencias da ausencia dunha mínima climatización. Por elo, dende a asociación veciñal demandan da Xunta de Galicia e ó Sergas “que tomen medidas inmediatas para paliar esta problemática pois a xente que vai alí con circunstancias de saúde complexas, pásao realmente mal”.
Por outra banda, dende iste colectivo apuntan que “a situación do edificio é absolutamente insostible cun equipamento envellecido e unhas instalacións do século pasado” e denuncian que “a falla de persoal que provoca que sexa case imposible conquerir cita con menos dunha semana de antelación”. E engaden que “os nosos asociados con nenos pequenos tamén nos reclaman que reivindiquemos que segue a haber eivas importantes na área de pediatría”.
Para o Colectivo Veciñal Carballiño “faise moi difícil entender a defensa a ultranza da sanidade galega que fixo unha concelleira da Coporación Municipal no pasado pleno, que rematou afirmando que ‘ela defende ó conselleiro, á Xunta e ó PP'”.
“O noso colectivo demanda aos políticos do Carballiño que defendan ós carballiñeses e que pelexen para mellorar as condicións dun Centro de Saúde impropio dun pobo coma o noso”, conclúen.
