O parlamento aproba unha proposta socialista para reclamarlle á Xunta que faga públicos antes do remate do ano os datos de falementos covid en cada residencia
A Comisión de Política Social do Parlamento aprobou hoxe unha proposición non de Lei presentada polo Grupo Socialista para reclamarlle á Xunta que faga públicos antes do remate do ano os datos dos falecementos por Covid – 19 ou sintomatoloxía compatible en cada residencia de Galicia. Marina Ortega esixiulle á Xunta e PP “unha desculpa” por ter agochado estes datos durante os dous últimos anos.
Ortega dixo que “é de xustiza” que a Xunta presente os datos tanto no Parlamento como aos familiares das vítimas, porque “non hai peor duelo que pasar polo falecemento dun familiar sen ter tódolos datos”. A iniciativa foi aprobada finalmente incorporando unha emenda do propio PP para sinalar que a Xunta debe cumprir coa sentenza do TSXG do pasado mes de maio que obriga a facer públicos os ditos datos.
Marina Ortega reclamou ademais que tanto a Xunta como o PP “se desculpen” diante dos usuarios das residencias galegas, así como cos familiares dos falecidos por covid e “diante de toda a cidadanía”. Dixo que deben dar contas por “mentir” durante os últimos dous anos para agochar os datos do impacto da pandemia nestes centros.
Sinalou que “non é xusto que o goberno galego negara os datos cando o 40 por cento dos falecementos por covid se rexistraban nas residencias de maiores, non é xusto que se vetara unha Comisión de Investigación no Parlamento” sobre o que sucedeu neses centros. E tampouco é xusto, engadiu, “que teñamos que estar hoxe, logo de 2 anos, falando do mesmo sen ofrecerlle á cidadanía a información que merece”.
Lembrou que esta Comunidade Autónoma é a que conta co maior número de persoas maiores de toda España, e preguntoulle á Xunta “que pretende con tanto escurantismo, ten algo que agochar?”, ao negarse ás peticións de información trasladadas dende o Grupo Socialista “por tódalas vías regulamentarias posibles”, co que o único que fan, dixo, é “sementar desconfianza”.
Acusou ao goberno galego de “mentirlle descaradamente á cidadanía sen pestanexar”, cando no primeiro lugar dixeran que “xa tiñamos a información, que xa existía na web do Imserso ou na páxina da Xunta, pero “o tempo deunos a razón e tiveron que recoñecer que os datos non existían”. O seguinte argumento, dixo, foi que non podían dar as cifras pola Lei de Protección de Datos, ata que o TSXG obrigou a facelos públicos.
Sen embargo, dixo, a seguinte versión do goberno galego foi que “querían dar os datos, pero que os centros non querían remitilos, e por iso non os facían públicos”, e mesmo chegaron a responsabilizar ao goberno central. Ortega lembrou que o goberno galego ten esas cifras “desglosadas por centro dende o primeiro momento”, porque son os únicos responsables de demandárllelos a cada residencia e a cada centro de maiores”.
Texto da iniciativa aprobada hoxe:
-“O Parlamento de Galicia insta á Xunta de Galicia a que, a través da Consellería de Política Social, se publique un informe no que se especifiquen os datos de falecementos por Covid – 19 ou sintomatoloxía compatible desglosado por cada centro de atención residencial en Galicia, nos termos establecidos na sentenza do Tribunal Superior de Xustiza de Galicia ao respecto, antes de que remate 2022”.
