A Sociedad Española de Médicos Generales y de Familia (SEMG) celebra desde hoxe e ata mañá en Ribadavia a Xornada de Medicina Rural+, unha cita que nace con vocación de continuidade e que aspira a consolidarse como punto de encontro anual da Atención Primaria. A cita reúne a 200 participantes presenciais, aos que hai que sumar todas as persoas inscritas para asistir de maneira telemática.
O acto de inauguración realizouse esta tarde baixo o lema “Raíces locais: rural desde o próximo” e contou coa participación do alcalde de Ribadavia, César Fernández; o deputado de Representación Institucional, Rosendo Fernández; Sofía López Linares, directora xeral de Planificación e Reforma Sanitaria da Consellería de Sanidade; Pilar Rodríguez Ledo, presidenta de SEMG, e Albert Foo, responsable de GdT de Medicina Rural SEMG. “Queremos agradecer á SEMG que escollese Ribadavia, o corazón do Ribeiro, para celebrar aquí o seu congreso nacional”, sinalou César Fernández, quen convidou aos asistentes a pasear polas rúas de Ribadavia e coñecer “o tesouro da Galicia interior”. O rexedor tamén agradeceu a “inestimable colaboración” da Deputación de Ourense e da Xunta.
Pola súa parte, Rosendo Fernández e Sofía López destacaron a importancia da atención sanitaria no rural, sobre todo na comunidade galega. “A medicina rural é a esencia da medicina pola cercanía e pola continuidade asistencial dos pacientes, desde que son nenos ata que son maiores”, apuntou López.
Pilar Rodríguez Ledo, presidenta da SEMG e médica de familia en Lugo, agradeceu o apoio das institucións locais e sanitarias, clave no proceso de dignificación e reforzo da medicina no eido rural. “Queremos poñer en valor a profesión, estamos nun momento de cambio e de oportunidade onde temos que camiñar todos xuntos para buscar solucións”, explicou Rodríguez, quen avanzou que a xornada rematará mañá coa presentación dun decálogo chamado Declaración de Ribadavia. “Farémola entre todos os asistentes, de xeito colaborativo e participativo”, detallou. Albert Foo asegurou que a elección de Ribadavia como sede deste primeiro encontro, que nace con vontade de consolidarse, non é casualidade. “É un icono da medicina rural, e queremos falar deste tipo de medicina, queremos facela atractiva para a xuventude e marcar unha liña de traballo, un decálogo que define a nosa folla de ruta”, apuntou.
Un amplo programa que culminará co Decálogo RURAL+
A xornada continuou despois da inauguración coa mesa “Medicina Rural e Territorio” na que se abordou o papel do municipio, as infraestruturas, a equidade e a identidade rural. A xornada seguiu cunha mesa de experiencias profesionais —Medicina de Familia, Enfermaría, residentes e proxectos comunitarios— e finalizou coa presentación de proxectos RURAL+ en investigación, docencia, asistencia, telemedicina e innovación social.
Mañá pola mañá, a xornada retomarase co lema “Horizontes rurais”, unha mesa estratéxica analizará o futuro da Medicina Rural desde a docencia, a intelixencia artificial, a sustentabilidade comunitaria, a visión dos mozos médicos, a investigación e a ética. Tamén se presentarán e analizarán con maior profundidade os resultados da Enquisa de Medicina Rural da SEMG.
O principal legado do encontro será a construción participativa do Decálogo RURAL+, un documento estratéxico que recollerá propostas concretas para fortalecer a formación, a retención de profesionais, a innovación organizativa e a colaboración coa comunidade. A SEMG prevé que este Decálogo sirva como folla de ruta para futuras políticas sanitarias no medio rural. A Xornada pecharase coa lectura preliminar das súas liñas principais e cun compromiso final co futuro da Atención Primaria rural.
A Xornada RURAL+ nace coa vontade de situar a Medicina Rural no centro do debate sanitario, non como excepción, senón como modelo inspirador de proximidade, integralidade e compromiso coas persoas. Desde Ribadavia lanzarase unha mensaxe clara: o futuro da Atención Primaria tamén se escribe desde o territorio, con profesionais implicados, institucións comprometidas e comunidades activas que entenden a saúde como un proxecto compartido.
