Onte deuse a coñecer a relación de candidatos ao Senado do PSdeG-PSOE, na que Rafael Rodríguez Villarino figura como número 2. Neste marco, Villarino, militante do PSOE, membro do Comité Provincial de Ourense e candidato ao Senado por esa provincia, remitiu un escrito ao Secretario Provincial, ao Secretario de Organización, á Comisión Executiva Provincial e á Comisión Provincial de Ética e Garantías do PSdeG-PSOE de Ourense.
No escrito solicita consulta e/ou copia das actas das asembleas das agrupacións locais da provincia relativas á proposición de candidatos ao Congreso e ao Senado, así como un informe da Comisión Executiva Provincial sobre a orde das candidaturas ás Cortes Xerais.
Villarino expón que participou como candidato no procedemento de votación celebrado polas agrupacións municipais de Ourense; que non se lle comunicaron os resultados desglosados das votacións nin se lle facilitou documentación oficial cos votos obtidos por cada aspirante, malia telo solicitado na Executiva Provincial e no Comité Provincial; e que, formando parte do Comité Provincial, tampouco se facilitaron eses resultados no tratamento das propostas de candidaturas. Engade que recibiu información segundo a cal os resultados tampouco serían comunicados á Comisión Executiva Provincial, extremo que pide comprobar e aclarar formalmente.
Sinala que a ausencia de información impide coñecer o respaldo obtido por cada aspirante e comprobar a correspondencia entre as votacións da militancia e a proposta provincial de candidaturas, que segundo o Secretario Provincial e o Secretario de Organización reflectía “o sentir maioritario da militancia da provincia”, un extremo que, di, ningún militante, membro do Comité Provincial nin el mesmo puideron contrastar.
O escrito invoca os artigos 196 e 360 do Regulamento Federal de Desenvolvemento, relativos ás propostas de candidatura e ao dereito á información e á transparencia.
En consecuencia, solicita:
- O resultado oficial e desglosado das votacións celebradas nas agrupacións da provincia de Ourense para a proposta de candidaturas ao Congreso e ao Senado, con indicación dos votos obtidos por cada aspirante e demais datos de escrutinio.
- Vista das actas de escrutinio e copia dos resultados de cada asemblea municipal, demais documentación oficial que permita comprobalos, e copia do informe da Comisión Executiva Provincial sobre a orde dos candidatos ás Cortes Xerais por Ourense.
- Que se examine se o procedemento se axustou aos Estatutos e regulamentos do PSOE e ás instrucións da convocatoria, adoptando, se procede, as medidas previstas na normativa interna.
- Que, se o procedemento segue pendente de revisión ou aprobación definitiva, se dea traslado da reclamación ao órgano competente antes da decisión definitiva, sempre que resulte procedente conforme ás normas e prazos aplicables.
A reclamación formúlase sen prexulgar a existencia de irregularidades, coa finalidade de obter información oficial, comprobar o procedemento e preservar os dereitos que puidesen corresponderlle como militante, membro do Comité Provincial e candidato neste proceso electoral.
