Ourense, 3 de novembro de 2026. A Confederación Empresarial de Ourense (CEO) completou unha misión institucional e comercial en China co obxectivo de reforzar as relacións empresariais internacionais, identificar novas oportunidades de negocio e favorecer a apertura do tecido produtivo ourensán aos mercados exteriores. A iniciativa tamén permitiu explorar a posibilidade de formalizar un convenio de colaboración para estreitar os vínculos empresariais entre ambos os territorios.
A delegación, integrada polo presidente da CEO, David Martínez Alonso, e o vicepresidente, César Blanco, desenvolveu unha axenda de traballo entre o 28 de outubro e o 3 de novembro en Chengdu e Chongqing, dous importantes centros económicos de China con gran actividade industrial, comercial, loxística e tecnolóxica.
En Chengdu, a delegación visitou entre o 29 e o 31 de outubro un destacado encontro comercial internacional no Centro Internacional de Convencións e Exposicións Century City. Así mesmo, participou na Feira Agrícola de Sichuan, a 16ª Feira da Pataca e a 12ª Feira Internacional Agroalimentaria da China, celebradas entre o 30 de outubro e o 2 de novembro, que reúnen empresas e profesionais do sector agroalimentario, a innovación agrícola e a modernización rural. Estas actividades permitiron coñecer de primeira man as tendencias do mercado asiático e identificar posibles vías de colaboración.
A segunda parte da misión desenvolveuse os días 1 e 2 de novembro en Chongqing, un dos principais centros industriais, loxísticos e comerciais de China. Alí profundouse nas oportunidades que ofrece este enclave para as empresas galegas, especialmente na identificación de socios comerciais, o acceso a novas canles de distribución e o desenvolvemento de alianzas estratéxicas. Neste contexto, cobra especial relevancia a Antena do Instituto Galego de Promoción Económica (Igape) en China, impulsada pola Xunta de Galicia, que ofrece apoio e infraestrutura para facilitar a entrada das empresas galegas no mercado asiático.
OS MELLORES ESTABLECEMENTOS
Con esta misión, a CEO reafirma a súa aposta por fortalecer a presenza do tecido empresarial provincial nos mercados internacionais e por promover novas relacións comerciais que poidan traducirse en oportunidades de investimento, innovación e crecemento, incluídas as pequenas e medianas empresas. A Confederación continuará traballando para achegar as empresas da provincia a novas oportunidades internacionais, favorecendo a diversificación da súa actividade e o fortalecemento da súa posición competitiva.
