“O termalismo europeo rearmase para saír fortalecido á nova normalidade”. Así o expresou hoxe Manuel Baltar, presidente da Deputación de Ourense e da Asociación de Cidades Históricas Termais de Europa ( EHTTA) na xornada inaugural da asemblea xeral desta rede, a máis importante do sector público termal europeo, na que Baltar participa desde o Pazo Provincial. Representantes de 53 territorios termais de 18 nacións reúnense (por videoconferencia) hoxe e mañá neste encontro considerado clave para trazar a folla de roteiro e analizar a situación do termalismo na etapa ” poscovid”.
Gobernantes, técnicos e expertos termais de España, Portugal, Reino Unido, Austria, Bélxica, Croacia, República Checa, Francia, Alemaña, Italia, Hungría, Luxemburgo, Polonia, Estonia, Grecia, Turquía, Acerbaixán e Xeorxia, poñen en común as súas estratexias e os seus novos plans cos que o termalismo vai facer fronte ás consecuencias da crise do COVID-19 para afrontar os novos modelos do turismo de lecer e saúde en Europa.
Na asemblea, onde se analizan aspectos económicos, organizativos e de cooperación entre as diferentes administracións e entidades, Manuel Baltar expuxo que nesta nova normalidade, “na que algúns países, como España, xa abrimos fronteiras ao turismo, Ourense é pioneira en ofrecer servizos termais a todos aqueles que nos coidaron durante estes meses, desde o sector da saúde ata as forzas e corpos de seguridade”.
“Un futuro de oportunidades”
O presidente Baltar fala do “futuro de oportunidades” que se abre para o termalismo europea nesta nova etapa, e un acontecemento relevante é, na súa opinión, a celebración do Día do Patrimonio Termal 2020, que en Europa conmemorarase en Baden Baden. O encontro que se está planificando nesta cidade balnearia servirá “para chamar a atención da Unión Europea sobre as nosas posibilidades de desenvolvemento e o noso papel no Plan de Recuperación de Turismo da UE”, e tamén refire Baltar o evento que terá lugar o ano próximo en Estados Unidos, “país que xogará un papel fundamental para o turismo termal que virá a Europa. A EHTTA desenvolverá todo o potencial da súa oferta de saúde, cultura e valores europeos, dirixíndose tamén a este mercado, actualmente tan demandado polo turista estadounidense”, afirma Baltar.
