Bernardo Varela, voceiro do grupo provincial do BNG, presentou unha moción de urxencia ante a Deputación de Ourense coa que demandará a rectificación do SERGAS e da Xunta de Galiza nesta vendetta do Xerente da Área Sanitaria.
AUDIO Bernardo Varela ( Premer na Imaxe )
O BNG ven de presentar unha moción de urxencia na Deputación provincial de Ourense ante o anuncio de que a xerencia da Área Sanitaria de Ourense/Verín/Valdeorras tería incoado un expediente contra o xefe de xinecoloxía do hospital de Verín, co que se pretende inhabilitar ao doutor Castrillo durante dous anos.
No BNG causa sorpresa e alarma ante a nova de que haxa aberto un expediente sobre un acontecemento sen consecuencias cando non se investigaron feitos graves de violencia obstétrica.
Para Varela “estando este expediente motivado por iniciativa de Felix Rubial, o xerente da Área Sanitaria que tentou fai un ano pechar a sala de partos do hospital de Verín, semella máis unha vendetta política contra este profesional que manifestou publicamente a súa disconformidade coa política de peche”
“O pleno da Deputación xa se viu obrigado a tomar partido durante o desenvolvemento deste conflicto, e a presión social favoreceu que esta institución se manifestase en favor dos intereses veciñais, contradecindo o posicionamento da xerencia e do conselleiro de sanaidade Jesus Vazquez Almuiña” afirma o voceiro nacionalista.
Por está razón o voceiro do grupo provincial do BNG, demandará no pleno da Deputación de Ourense deste venres 27 de novembro que o pleno provincial exprese o seu respaldo ao xefe de xinecoloxía de Verín, o doutor Castrillo.
Así mesmo é preciso que a Deputación tome partido na defensa do doutor Castrillo e “esixiremos que Deputación de Ourense inste á Xunta e ao Sergas a arquivar de inmediato o expediente polo que se pretende inhabilitar durante dous anos de exercicio ao Doutor Castrillo.” Manifesta Varela.
Moción relativa á situación das unidades de lactantes e preescolares/escolares no CHUO para garantir o seu funcionamento correcto e separado.
O BNG tamén presentará ante o vindeiro pleno deste venres a preocupante situación que se está a dar no CHUO, e que require dunha inmediata solución de cara a dar un axeitado servizo hospitalario e asistencial á poboación infantil que acode a este centro.
Desde os meses de verán unificáronse no CHUO a unidade de lactantes que abrangue até os dous anos de idade, e na que se atende en moitas ocasións bebés de poucos días e crianzas con atencións moi específicas. E a unidade de preescolares/escolares, que atende a nenos e nenas entre 2 e 14 anos, e en ocasións mesmo de ingresos puntuais de pacientes de ata 17 anos por criterio facultativo. Polo tanto, non é xustificable unificar estes dous servizos.
Para o voceiro do grupo pronvincial “neste momento non hai unha atención en espazos separados e adecuados axeitadamente e con persoal suficiente, o que supón un grave deterioro asistencial e un paso atrás na atención á pobación infantil de Ourense.” Clarifica Varela que “a precarización e o recorte de persoal do CHUO é a razón última desta situación”.
Por esta razón o BNG demanda desde a Deputación provincial que a Xunta de Galiza “rectifique de forma inmediata a unificación práctica das unidades de lactantes e preescolares e garantir o seu funcionamento separado, en espazos separados e debidamente acondicionados e con persoal suficiente, priorizando o persoal con formación pediátrica”
“Tamén demandaremos a reincorporación inmediata do persoal especializado aos seus postos de traballo nesta área tan sensible e especializada, namentres que se establezan canles de diálogo que garantan a operatividade do servizo no futuro e os seus dereitos laborais” afirma o voceiro nacionalista.
