O Concello de Ribadavia acollerá o vindeiro 16 de xullo a Carroza do Teatro Real, unha das iniciativas culturais máis destacadas de difusión da ópera en España, que achegará á veciñanza e ás persoas visitantes un recital ao aire libre con acceso libre e gratuíto. Ribadavia será, xunto con Foz, unha das dúas únicas localidades galegas incluídas na xira da Carroza do Teatro Real durante este ano, unha programación que percorrerá máis de trinta municipios de toda España levando a música lírica a espazos públicos e achegando este xénero a novos públicos.
A actuación estará protagonizada polos artistas do programa Crescendo, Jóvenes Talentos del Teatro Real, unha iniciativa impulsada pola Fundación Amigos do Teatro Real para favorecer a formación e a proxección profesional das novas promesas da creación operística. Desde a súa posta en marcha en 2021, preto de 120 artistas de vinte nacionalidades participaron neste programa de excelencia. O recital ofrecerá un amplo percorrido por algunhas das páxinas máis coñecidas da historia da ópera e da zarzuela, con obras de compositores como Puccini, Verdi, Mozart, Bizet, Offenbach, Saint-Saëns, Dvořák, Moreno Torroba, Sorozábal ou Chapí.
Entre as pezas que poderá escoitar o público destacan interpretacións tan recoñecidas como “O mio babbino caro”, de Gianni Schicchi; a Barcarola de Les contes d’Hoffmann; “E lucevan le stelle”, de Tosca; “L’amour est un oiseau rebelle” (Habanera), de Carmen; “No puede ser”, de La tabernera del puerto; ou o célebre brindis “Libiamo, ne’ lieti calici”, de La traviata, co que concluirá o concerto. O elenco estará formado pola soprano Dragana Paunovic, a mezzosoprano Yasmin Forastiero, o tenor Eduardo Pomares e o barítono Enrique Torres, todos eles integrantes do programa Crescendo.
Desde o Concello de Ribadavia destacan a importancia de que a vila forme parte desta xira nacional, que achega unha programación artística de primeiro nivel ao espazo público e reforza a aposta municipal por ofrecer unha oferta cultural diversa, accesible e de calidade durante o verán.
A Carroza do Teatro Real consolidouse desde a súa creación en 2022 como un dos grandes proxectos de descentralización cultural do Teatro Real, permitindo que milleiros de persoas poidan gozar da ópera en prazas e espazos emblemáticos de toda España. A súa chegada a Ribadavia supón unha oportunidade única para vivir unha experiencia musical de primeiro nivel nun formato aberto e gratuíto para toda a cidadanía.
